Chelsea chuan an midfield thuam chak nan Moises Caicedo leh Declan Rice lak luh an tum niin thuchhuah thenkhat chuan an tarlang. 

N'Golo Kante chuan free transfer-in Al-Ittihad lam a pansan a, Chelsea chuan a tlem berah an senior midfielder 4 vel tun nipui hian an chhuahtir rin a ni.

Kante bakah hian Mateo Kovacic leh Ruben Loftus-Cheek te chuan Manchester City leh AC Milan an be mek nia hriat a ni a, Chelsea-in inremna nghet an siampui loh avangin  Denis Zakaria pawh Juventus lamah a kir leh tawh.

Tun nipuiah Chelsea chuan midfield lam an buaipui a ngai hle dawn a, PSG laka Manuel Ugarte an hloh hnuah Caicedo leh Rice hi an mitmei ta a ni.

An tum hi a hlawhtling thei ang em? a hriat loh a, Caicedo hi Arsenal manager Mikel Arteta chuan a veh uluk hle. Rice pawh tun nipuiah Emirates Stadium lama thlem luh a tum dawn. 

Manchester City, Manchester United leh Bayern Munich pawhin Rice hi an ngaihven ve reng a, a hlut lai tak a nih avangin West Ham lam chuan a man an chhiar to viau bawk. A manah £100m chuang an chhiar nia report a ni a, an tawlhsawn dawn lo a ni.

Rice hian West Ham-ah kum 2 chhung atan contract a la nei a, a aia rei pawh pawhsei theih a la ni. Brighton lam chuan Caicedo man chu Rice ang em emin an chhiar to lo a, a signature neih nan £80m bawr vel a tawk rin a ni.