Premier League club sum ngah Chelsea chuan, World Cup-a Argentina player pawimawh em em Enzo Fernandez chu pound maktaduai 106 in an dawr tih chanchinbu mite chuan an tarlang.

Chelsea-in Benfica midfielder tana an sum thehchhuah zat hi a release clause ai pawhin a tam zawk nia sawi a ni a, thudik a nih chuan Benfica hian Chelsea dawrna hi an pawm mai pawh a rinawm hle.

Fernandez hi Qatar World Cup-ah khan a khel tha hle a, Argentina an champion theihna kawnga player pawimawh tak niin, Young Player of the Tournament-a thlan a ni nghe nghe a ni.

World Cup-a a chet that em avangin Fernandez hi duhtu an pung hle a, mahse Chelsea hi tun dinhmuna sum thehchhuak huai ber an nia sawi an ni a, Manchester United pawhin Fernandez hi an duh hle nia tarlan a ni bawk.

Chelsea hian midfielder an mamawh chho viau a, Jorginho leh N'Golo Kante te chuan tun season daih bak Stamford Bridge-ah contract an nei tawh lo ve ve. Hetiang a nih avang hian Chelsea hian Fernandez hi January thlaa lakluh a, nakkum nipuia West Ham leh England midfielder Declan Rice lakluh a tum niin chanchinbu thenkhat chuan an tarlang.

Fernandez hi Argentinian club River Plate academy chhuak a ni a, River Plate-ah hian a professional career bul tanin, Portuguese club Benfica hian kumin June thla mai khan River Plate atang hian an lalut a ni.