15 Sep 2020 03:35

bakteaJr.

Mizo tlangval

​Chelsea-in point 3 an hlawhchhuak

London club, tun nipui bazaar chhunga Premier League club zinga sum seng hnem ber Chelsea chuan Falmer Stadium-ah Brighton tlawhin, Chelsea hian 3-1 in khual mualah hnehna an chang.

Chelsea tan hian Jorginho, Reece James leh Kurt Zouma-te chuan goal khat theuh an khunga, Brighton goal neih chhun hi Leandro Trossard-a khung a ni ve thung.

Chelsea manager Frank Lampard chuan an player lakluh thar pahnih Timo Werner leh Kai Havertz te chu inkhel bul a tan tir nghala, German player pahnih te hi langsar em em lo mahse, a khel tha thawkhat viau a tih theih awm e.

Mual neitu lam Brighton hian inkhel bul an tan tha viaua, an khel a dikin, Chelsea ai pawh hian a dik tih theih a ni a, mahse minute sawmhnih vel khelh a nihin an tihsual atangin Chelsea-in penalty an hlawhchhuak.

20mins vel an khela, Brighton lam hi tlarhnung atangin an in pass chhuak; Alzate-a pass chu Mason Mount chuan lo la in, a hmaa awm Werner a pe a, Werner hian ball hi box chhungah um lut dawn mahse, Brighton keeper Ryan chuan a titlu a, Chelsea-in penalty an hlawhchhuak.

Penalty sport atang hian Jorginho chuan Chelsea hmahruaina goal a khunga, Jorginho hian Chelsea tan penalty-shoot out tih lovah penalty a la hlah ngai lo.

Chelsea midfielder Ruben Loftus-Cheek khelh chu inkhel bul tan tir a ni a, a khel chhe hle a, Brighton tan Chelsea player hlui Lamptey a khel tha hle a, dinglamah a tal hnawk hle. Chelsea player thar pahnih Werner leh Havertz te an team mate dang te nen an la inman tawk lo tih a langa, an khelh ho tam hunah an hmuhnawm chhoh viau erawh a rinawm hle.

First half-ah goal khat bak a lut lova, second half-ah minute 10 vel khelh a nihin, Brighton hian an si phurh an sut; yard 22 vela hla atangin Trossard chuan Chelsea goal-ah ball a shoot a, Chelsea keeper Kepa Arrizabalaga chuan a save thei ngeia a lan laiin, a chhuaha, 1-1 a ni.

Brighton goal khung atanga second 99 hnuah Chelsea hian hma an hruai zui leh nghala, James chuan yard 25 vela hla atangin goal pui tak a khunga, kawh em emin Brighton goal-ah ball a pet lut. Darkar khat vel khelh a nihin, Brighton hian chance tha tak an hlaha, Alzate-a ball cross tha zet chu, changtu neilo far post lama awm Lewis Dunk chuan a lo tauh lut thei lova, chance tha erawh a va ni chiang em.

70mins khelh a nih hma deuhin, Chelsea hian goal an khung belha, corner atanga James-a ball vawrh luh chu Zouma chuan lo khawihin, Ryan-a’n a save ngei tura ngaih a ni laiin, Brighton defender Webster chuan a lo khawih kawia, goal-ah lut zuiin, 3-1 in Chelsea hian Falmer Stadium-ah hnehna an chang ta a ni.

Brighton 1-3 Chelsea

(Trossard 54’) (Jorginho 23’pen, James 56’, Zouma 66’)

Player Ratings

Brighton: Ryan 5, White 6, Dunk 5, Webster 5, Lamptey 7, Alzate 6, Bissouma 7, March 6, Lallana 6, Maupay 5, Trossard 7. Connolly 6, Gross 6, Jahanbaksh 6.

Chelsea: Kepa 5, James 8, Christensen 6, Zouma 6, Alonso 6, Kante 6, Jorginho 6, Mount 6, Havertz 5, Loftus-Cheek 5, Werner 6. Subs: Barkley 6, Azpilicueta 6, Hudson-Odoi 6.