Chelsea chuan kum 2018 nipui laia an lei, Spaniard goalkeeper Kepa Arrizabalaga chu thlak dan an ngaihtuah niin a langa, Atletico Madrid goalkeeper Jan Oblak chu Chelsea hian an ngaihven hle niin English chanchinbu te chuan an tarlang.

Chelsea hian nikum hmasa khan Kepa hi Athletic Bilbao atangin khawvela keeper manto ber ni turin an leia, a manah Chelsea hian pound maktaduai 72 vel lai an seng.

Kepa hi a man to hle mahse beisei a pha lo hle a, hmasawn lam a pan lutuk lo bawk nen Chelsea chuan chhuah tira, midang lak dan an ngaihtuah mek.

Chelsea hian Oblak an duh a, a manah sum fai thahnem tak bakah Kepa hi pek tel an phal nia sawi a ni a, Atletico lam hian an duh dawn em tih erawh sawi theih a awm rih lo.

Kum 27 mi Oblak hian nikum khan contract thar ziakin, release-clause pound maktaduai 120 a nei mek nia sawi a ni a, Chelsea chuan hetiang zat em em seng lova Oblak lakluh dan an dap mek niin a lang.

Kum 25 mi Kepa hi a tha tawk lo hle a, tun season-a Premier League goalkeeper zawng zawng zinga save percentage nei chhe ber a ni nghe nghe.

Chelsea manager Frank Lampard chuan Kepa hi lockdown hma khan a chhawr tlem chho tan hle a, pound maktaduai 72 man hi bench-ah dahin, kum 38 mi Willy Caballero hman chang a nei fo a, Kepa pawh hian chhuah a hnial vak a rinawm loh.

Slovenian keeper Oblak hi tunlai goalkeeper tha ber zinga mi a ni a, Atletico-ah hian kum 2014 atang khan awm tawhin, tunah hian kum 2023 thleng daih contract a la nei mek a ni.