Chelsea chuan an midfielder Mason Mount chu a phu tawka dawrtu an hmuh chuan hralh an tum a, mahse a man an chhiar zata ngam an awm loh chuan an kawl zel rih dawn niin chanchinbu mite chuan an tarlang.

Mount hian Chelsea-ah season khat daih bak contract a nei tawh lova, Chelsea nen contract thar chungchangah inremna an neih theih loh avangin, kumin nipui bazar inhawn hunah Stamford Bridge chhuahsan ngei tura ngaih a ni.

Chelsea hian kum 24 mi manah hian pound maktaduai 70 tal an duh niin chanchinbu mite chuan an ziak a, Chelsea hian pound maktaduai 70 aia tlawm hian Mount hi hralh tumna an nei lo niin a lang.

English midfielder hi Manchester United chuan lakluh an tum hle a, Chelsea leh United te pawh hi an inbe tan tawh nia sawi a ni. Mahse United hian Chelsea-in Mount-a mana an chhiar zat hi an la ngam lo niin report a ni mek a, United hian pound maktaduai 55 vel an thehchhuak.

Chelsea hian Mount hi chelh an duh a, mahse a hlawh chungchangah an hmin thei lo. Chelsea hian nakkuma a thlawna an chan mai loh nan hralh tum mah se, Mount hi season tharah Chelsea-ah bawk a awm leh maithei a ni.