Kum 24 mi English midfielder Mason Mount chuan Manchester United panin, kum 5 daih Old trafford-ah contract a ziak. A man hi £60m vel a ni chho dawn nia report a ni.

Mason Mount hi Chelsea academy chhuak a ni a, kum 18 lai Stamford Bridge-a a khawsak hnuah Chelsea a chhuahsan ta a, MUTV-in an kawmnaah Mount chuan Chelsea game plan-a a tel tawh loh thu a sawi chhuak.

"Thla eng emaw zat liamta atang khan, Chelsea game plan-ah ka tel tawh lo tih a chiang a ni. Chutih mek lai chuan Manchester United an rawn lang ta a, thutlukna ka siam ta a ni.

"He club hi a lian khawp mai, player ropui tak tak an khel thin a, he team-a tel ve hi a hma pawhin ka lo chak em em tawh thin. Pre-season atanga tel nghal ka duh a, chu chu ka bul tanna atana ka duhthusam a ni bawk.

"United hi club lian tak a ni chiang e, chhungkaw lian tak ang an ni a, ka luhtirh khan ka hrethiam chho chiah chu chu.

"Season tawp rual khan United ka pan hun tur nghah chhung tih tawi nan Disneyland te kan tlawh nghe nghe," tiin Mason Mount chuan a sawi.

Erik ten Hag chuan Manchester United jersey number hlut em em; Number 7 chu Mount hi a lo pe chat mai.

"He club-ah hian player ropui tak tak an lo khel tawh thin, kan naupan lai pawhin an inkhel kan en thin a, player thenkhat te kha chu ka lo tan ve em em thin. He hmun ka pan thei hi ka lawm a ni.

"United ka pan theih nan hian theihtawp ka chhuah bawk a, tunah a tak ram ka thleng ta a, ka phur tawh tak zet a ni.

"Ka naupan laiin idol ka nei ve thin alawm, Ronaldo chungchang ka sawina video tawite te pawh in lo hmuh kha. A inkhel en kha nuam ka ti thin em em.

"Tin, David Beckham hian nasa takin min pui ka ti lo thei lo. A free kick pet dan technique te kha ka zir nasa thin khawp mai," tiin Mount chuan a sawi bawk.

Kumin pre-season-a an game hmasa berah Manchester United chuan Leeds United an hmachhawn a, si hnih faiin Red Devils hi an chak. Pre-season atanga bul tan duh Mason Mount chu Erik ten Hag chuan Leeds hmachhawnin inkhelh bul a tantir nghe nghe  a nih kha.

Mount-a khelh danah United boss a lungawi hle, "Mount kha a khel tha khawp mai. Skills a neih that avangin hei hi kan beisei sa reng a ni ve bawk a, Manchester united hlawhtlinna kawngah a pawimawh dawn hle tih ka chiang. A chet dan hi kan duh dan tak a nih avanga belchiang kan ni bawk,"tiin Ten Hag chuan a sawi.