Chelsea chuan loan hmanga Romelu Lukaku hawh tumte hnar zel an tum a, tun nipui chhungin a ngheta chhuahtir an duh.
Belgian striker hian 2021 Thitin thla khan a vawi hnih nan a zawm a, a manah £97.5m lai seng mahse kum khat bak an chhawr lo. 2022-23 season-ah Inter Milan-in an hawh a, season zo ta chiahah khan AS Roma-in an kawl.
Chelsea hian lei ngam an awm anih chuan, £37m vela kal tir an phal a, kar khatah £325,000 zet a hlawh bawk nen a rang lama hralh an duh. Roma-in kawlzui an rilruk laiin, Chelsea chhiar zat an pe thei lova, AC Milan leh Napoli-te pawhin an ngaihven tih thawm a awm.
Italian club-te hian sum lama harsatna an neih avangin an bawhzui a rinawm loh a, The Blues an tawlh hniam anih chuan an dawr ang. Chelsea-in Napoli ngenna pawm thei nise chuan Victor Osimhen nen an inthleng thei a, mahse Nigerian striker hi an awt lo.
London club hian nikum nipui lai khan Saudi Arabian club Al-Hilal dawrna an pawm a, amaherawchu Lukaku-in a zawm duh lo. Napoli-in an duh chhan pakhat chu an manager thar Antonio Conte vang a ni a, a enkawl tawh thin hi thawhpui leh a pawi tilo.
Chelsea leh Tottenham boss hlui hian kum thum daih contract ziakin a zawm a, 2023 vau thlaa Spurs a chhuahsan hnuah hna a nei leh ta. London hmar vengah che tha lo mahse, Chelsea a kaihhruai laiin Premier League an chawi a, an ban hmain FA Cup a lakpui bawk.
Kum 54 mi chuan, "Thutna (bench) pawla thut hlan ka nghakhlel a, khawvela hmun pawimawh ber pakhat an ni. Club leh team a than theih nan theihtawp ka chhuah dawn a, hei bak chu intiam ngam ka nei rih lo. Coaching staff-a awm zawng zawng kan phur a, sang tak kan thlen theih ka beisei." tiin a sawi.
Conte hian 2011 leh 2014 inkar khan Serie A-ah Juventus a champion pui vek a, 2021 khan kum 11 hnua a vawi khat nan Inter Milan a champion pui bawk. Napoli hian nikum khan Serie A an awp thung a, kum 33 hnuah champion-in an che tha hle.
Season zo taah erawh an tlahniam duai a, parukna niin beisei an pha lo. Walter Mazzarri an ban hnuah Francesco Calzona an ruai a, Slovakian manager hian thla thum enkawlin an that phah lem lo. Season thara Champions League khel tur Bologna pawhin manager thar an nei a, kum hnih daih contract ziakin Fiorentina boss hlui Vincenzo Italiano an lalut a ni.