Chelsea chuan season thar atan Real Madrid striker Luka Jovic chu loan-a lak luh theih an inbeisei hle niin English chanchinbu mite chuan an tarlanga, Real Madrid pawh hian an striker hi chhuah tir rih an hnial lo nia sawi a ni.

Jovic hian nikum nipui lai khan German club Eintracht Frankfurt atangin Real Madrid hi a zawma, Real hian Serbian striker manah hian pound maktaduai 52 an seng.

Frankfurt lama a chet that avangin Real hian lei mahse Jovic hi beisei angin a khel thei rih lova, season kal mekah hian competition zawng zawngah Real tan goal hnih bak a la khung lova, season hmasa erawh khan Bundesliga-ah goal 30 lai a khung.

Beisei a phak loh avangin kum 22 mi hi a khel tam lo reng bawka, La Liga-ah vawi hnih chiah inkhel bul la tanin, vawi 11 bench atangin a lut tawh bawka, Real chhuahsan rih mai chu a hnial a rinawm loh.

Jovic hian inrintawkna a neih thar leh theih nan Real chuan season tharah hian loan-a chhuah tir rih mai an duh tih Spanish chanchinbu lar Marca chuan a tarlanga, club hrang hrang beng verh nghalin, Chelsea chu Jovic la tura rinkai ber an ni mek.

Real hian Jovic hi an chhuah tir thei a nih chuan Borussia Dortmund atangin goal thun khawl Erling Haaland chu lak luh an tum ngei dawn tih tarlan a ni bawka, Real hian Haaland hi Karim Benzema thlak turin an duh tih tarlan a ni.