Chelsea chuan an football club chanchina a vawi khat nan FIFA Club World Cup an chawi a, final inkhelah 2-1 in Brazilian club Palmeiras chu Abu Dhabi-ah an hneh.
Chelsea tan Romelu Lukaku chuan second half-ah goal a khung a, a hnuah penalty hmangin Raphael Veiga chuan Palmeiras si phurh a sut a, 1-1 in hun pangngai a zo, Extra Time khelh niin, Extra Time-ah Kai Havertz chuan Chelsea champion-na goal a khung.
English club zingah Chelsea hi Club World Cup chawi thei pathumna an ni a, a hmain he trophy hi Manchester United leh Liverpool ten an lo chawi tawh a ni.
Chelsea captain Cesar Azpilicueta chu FIFA Fair Play Award hlan a ni a, Azpilicueta hi Chelsea player awm tawh zawng zawng zinga trophy lian chawi kim thei awmchhun a ni.
Chelsea defender kum 37 mi Thiago Silva chu 2021 Club World Cup Golden Ball (Best Player) lawmman hlan a ni a, Brazilian defender hi final inkhela Man of the Match atana thlan a ni bawk a ni.
Chelsea 2-1 Palmeiras [AET]
(Lukaku 55’, Hevertz 117'pen) (Veiga 64’pen)
Player Ratings
Chelsea: Mendy 7; Christensen 6, Thiago 6, Rudiger 7; Azpilicueta 6, Kante 7, Kovacic 6, Hudson-Odoi 7; Mount 6, Havertz 8; Lukaku 7. Subs: Pulisic 6, Werner 7, Saul 6, Ziyech 6, Sarr 6.
Palmeiras: Weverton 6; Rocha 7, Gomez 8, Luan 7, Piquerez 7; Danilo 7, Ze Rafael 7; Scarpa 6, Veiga 7, Dudu 7; Rony 6. Subs: Jailson 6, Wesley 7, Atuesta 6, Navarro 6, Deyverson 6.
Inkhel tir lam a hmuhnawm hran lova, first half chhungin Chelsea hian Palmeiras tlarhnung felfai tak an thiat thei meuh lo.
Second half-ah erawh goal a lut har lova, minute sawm an khelh tlin hma hretin Chelsea hian hma an hruai a, Callum Hudson-Odoi chuan veilam atangin box-ah tha takin ball a cross lut a, near post lamah Lukaku lo awmin, Belgian striker hian goal-ah a lo tauh lut a, Chelsea goal hmasa zawk a lut.
Darkar khat chuang hret an khelhin throw in atanga ball lo kal chu Chelsea defender Thiago Silva chuan lo tauh tumin a zuang a, mahse ball hian Silva kut a fuh a, hand-ball niin Palmeiras in penalty an hlawhchhuak. Palmeiras tan Veiga a rawn pen chhuak a, Brazilian midfielder Veiga hian penalty hi goal-ah chantirin Palmeiras si phurh a rul.
90mins thlengin goal khung belh thei an awm lova, Extra Time an lut. Extra Time-ah pawh goal a lut lawk thei lova, penalty shoot-out hmanga champion zawn a ngai dawn emaw tih hnuah Chelsea hian 115mins chuang an khelh hnuah penalty an hlawhchhuak ve thung. German midfielder Havertz chuan Chelsea penalty hmuh hi goal-ah khungin, 2-1 in Chelsea hian hma an hruai.
Hun tawp dawnah Palmeiras player Luan chuan last man Havertz a ti tlu a, referee-in side monitor-a a en hnuah Luan hi a vawi hnih nan yellow card pe in, Brazilian defender hi hnawhchhuah a ni a, kim lovin Palmeiras an khel zo a, Chelsea hi 2-1 a chakin, 2021 FIFA Club World Cup champion an ni ta a ni.
