Norwich City chuan Carrow Road-ah Chelsea an lo mikhual a, he inkhelah hian goal 5 zet a lut a, a tawpah mikhual team chu 3-2 in an chak a, Frank Lampard chuan a vawi khatna atan chak hmel a hmu.
December 1994 hnuah Norwich chu Chelsea lakah hian an che fuh thei lo hle a, John Deehan kaihhruaina hnuaiah Chelsea chu Carrow Road-ah hian 3-0 in an lo hneh a, hemi hnuah hi chuan vawi 2 an inhnehtawk a, vawi 8 zet chu an tlawm tawh a. An inkhelh hma hian inelna hrang hrangah Chelsea chu Norwich lakah hian match 15 chhung chu an tlawm tawh lo a ni.
Daniel Farke chuan ni sarih kaltaa Newcastle United an hneh tuma a khelhtirte bawk kha bul a tantir a. Norwich boss hian thlak danglam pakhat chu a nei a, chu chu substitute bench-ah Patrick Roberts aiin Timm Klose chu a thuttir a. Match hnih khelha goal 2 thun tawh Teemu Pukki chu tlar hmaah a dintir leh a ni.
Frank Lampard chuan ni ruk kaltaa Leicester City nen an inhnehtawk tuma khel kha tlem chu a thlak danglam a. N’Golo Kante chu a ke rek a tihnat avangin squad-ah a tel lo a, a aiah hian Mateo Kovacic chu a lut a. Tlar hma lamah Tammy Abraham chu Olivier Giroud aiin a lut bawk a ni.
Norwich (4-2-3-1): Tim Krul; Max Aarons, Grant Hanley (c), Ben Godfrey, Jamal Lewis; Moritz Leitner, Tom Trybull; Todd Cantwell, Marco Stiepermann, Emiliano Buendia; Teemu Pukki
Subs: Timm Klose, Ralf Fahrmann, Kenny McLean, Mario Vrancic, Alexander Tettey, Sam Byram, Dennis Srbeny
Chelsea (4-2-3-1): Kepa Arrizabalaga; Cesar Azpilicueta (c), Andreas Christensen, Kurt Zouma, Emerson Palmieri; Jorginho, Mateo Kovacic; Ross Barkley, Mason Mount, Christian Pulisic; Tammy Abraham
Subs: Marcos Alonso, Fikayo Tomori, Willian, Willy Caballero, Michy Batshuayi, Olivier Giroud
Inkhel an tan deuh chauh a, goal a lut nghal der mai a. Minute 3 chauh an khel hman tihin Christian Pulisic chuan Cesar Azpilicueta chu ball a pe a, hei hi dinglam sirah chuan Azpilicueta chuan a tlanpui a. Norwich goal lama awm Tammy Abraham chu a pe phei a, hei hi Abraham chuan a lo thun a, Chelsea chu hma a hruaipui nghal der a.
Kum 21-a upa Tammy Abraham hi kum 13 chhung chu Chelsea player a ni tawh a, club hrang hrang pathumah loan-in a chhuak tawh a, Chelsea tana goal a thun hmasak ber niin, a goal hmasa ber thun tur hian kum 13 zet chu a nghak a ni.
Chelsea hi an lawm rei lo hle a, minute 6-ah mual neitu lampang chuan goal an thun zui ve leh nghal a. Todd Cantwell chuan Teemu Pukki chu ball a pe a, hei hi Pukki chuan awlsam deuhin Kepa Arrizabalaga kap karah a lo thun a, Norwich si phurh chu a sut ve leh nghal a ni.
Minute 17-ah Mason Mount chuan goal a thun ve leh a, he inkhela a vawi hnihna atan Chelsea chuan hma an hruai leh theih phah a. Christian Pulisic chuan Mount chu ball a pe a, hei hi Mount chuan lain Tim Krul man theih lohin Norwich goal-ah chuan a thun a, 2-1 a ni.
Norwich chuan an si phurh sut ngei an tum bawk a, minute 30-ah an thil tum chu an tihlawhtling ta nge nge a. Emiliano Buendia chuan Teemu Pukki chu ball a pe a, hei hi Pukki chuan chep deuh atangin Chelsea goal-ah chuan a thun a, 2-2 a nih bakah match thum khelhah Premier League goal 5 a thun ta der mai.
Half time thlengin team pahnihte hian goal an thun belh tawh rih lo a, 2-2 in an la inhnehtawk chho zel a ni.
Second half an khel chho leh a, mikhual team zawk Chelsea chuan point 3 hlawh chhuah ngei tumin beihpui an thlak a, inkhel pawh an thunun hle a. Blues hian ball chang hnem viau mahse goal erawh an thun thei mai lo thung.
Minute 68-ah Chelsea chuan goal an thun leh ta nge nge a. Kepa chuan Pukki ball pet a lo dang a, he thil thlen atanga second 30 vel lekah Tammy Abraham chuan mual lehlamah goal a va thun zui zat a, Chelsea chu 3-2 in hma a hruaipui a ni.
Kum 21 leh ni 326 ni mek Tammy Abraham hi Chelsea tan game khata Premier League goal 2 thun thei naupang ber niin, a hmaa hetiang ti thei naupang ber chu January 1998 Coventry laka goal hnih thuntu Mark Nicholls a ni.
Hun tawp thlengin goal dang a luh belh ta lo a, Chelsea chu 3-2 in an chak a, an manager Frank Lampard kaihhruaina hnuaiah a vawi khatna atan chak hmel an hmu ve ta a ni.