Chelsea chuan an hnena lut turin Real Betis rawlthar Assane Diao an duh a, a chhungte pawh an be tawh niin AS-in an ziak.

Kum 18 mi hian La Liga season kal mekah goal hnih a khung tawh a, Europe club lian dangte pawhin an hmutai viau tawh niin thuthang a awm. Chelsea hian team dangte chet ve hmain thlun ngheh an duh a, nakin lawka tha thei anih avangin chan an tum lo.

Estadio Deportivo tarlan danin The Blues hian a chhungte an hmu tawh a, a agent pawh an titipui tawh niin an sawi. Diao hian a contract neihlaiah leichhuah theihna £30m a ziak tel a, winger mamawh Newcastle United, Liverpool leh Manchester United-te pawhin biak an tum tih thawm a awm.

Chelsea hian nakin hun thlir ranin player an lalut mek zel a, hmalam hun ngaihtuah chunga an thlemluh zingah hian kum 20 mi David Datro Fofana, kum 19 mi Lesley Ugochukwu leh kum 20 mi Carney Chukwuemeka-te pawh an tel. An duh anga engkim a kal anih chuan Diao hi thlasik bazar laia lei fel an duh a, loan hmanga chhuahtir rih an pawi tilo bawk.

Cole Palmer, Raheem Sterling, Mykhaylo Mudryk leh Noni Madueke-te an awm avangin Diao tan hmun chan theih a beiseiawm loh a, nakin hun thlir chungin club danga a khelhchhuah phawt a rinawm ber. Real Betis academy director Miguel Calzado chuan an hnena awmzui zel turin an duh tih thuthar lakhawmtute a hrilh a, Diao tana tha ber chu hmun dang pan rih loh a ni tih a sawi.

Kum 18 mi hian 2027 nipui thleng daih contract ala nei a, midfielder angin bultan mahse winger anga ngaih a ni tawh. Spain tan Under-18 atanga Under-21 thlengin a khel vek tawh a, Senegal-a piang ni mahse a seilenna Spain tana khelh a thlang a ni.