Chelsea chuan manager thar an zawng zel a, German manager Julian Nagelsmann leh Chelsea hotu te chu a vawi khat nan hmaichhanah an inhmu niin Sky Sports leh chanchinbu dang te chuan an tarlang.

Chelsea hotu zinga mi pahnih Chris Vivell leh Laurence Stewart te hi Nagelsmann-a hmelhriat sa an ni a, an pathum hian RB Leipzig lamah an lo awm ho tawh. Kar hmasa khan Chelsea director Vivell leh an sporting director pahnih Stewart leh Paul Winstanley te chu Germany-ah Nagelsmann hmu tur hian an zin nia sawi a ni.

Bayern hian an manager a nihna atangin Nagelsmann hi ban mah se, a contract erawh an la tihtawp sak lo niin a lang a, hemi avang hian Nagelsmann hi Chelsea-in an la duh a nih chuan an khulchhuah a ngai dawn.

Chelsea hian Nagelsmann bakah hian Bayern hi inremna an neihpui tel a ngai a, hei hi midang aia thil a khirh chhan niin a lang a, mahse Chelsea hian Bayern hi inremna neihpui theih an inbeisei viau niin chanchinbu mite chuan an ziak.

Bayern hian Nagelsmann an ban hnuah, an manager thar atan Chelsea manager hlui Thomas Tuchel an la ve thung a, Tuchel hian Chelsea-a a lo thawhpui thin Anthony Barry chu a coaching staff-a lakluh a duh ve bawk.

Chelsea hian Barry hi hman tangkai an tum niin a lang a, Barry hi Bayern-a an kal tir dawn a nih chuan Nagelsmann an khulchhuahna tur pawh man to lutuk lo a nih theih an beisei nia tarlan a ni.

Chelsea hian Nagelsmann bakah hian Luis Enrique, Mauricio Pochettino leh Ruben Amorim te pawh an bia a, mahse tun dinhmunah kum 35 mi Nagelsmann hi an mi duh ber a nih English leh German chanchinbu te chuan an tarlang a ni.