Chelsea leh Borussia Dortmund te chu Jamie Gittens chungchangah an inrem ta a, Chelsea hian kum 7 chhung atan contract an ziahpui dawn niin The Athletic chuan a tarlang.

Kum 20 mi Dortmund forward hian Chelsea zawm a duh a, Dortmund pawhin hralh an lo hnial bik lo a, team hnih te £30m velin an inrem nia report a ni.

Gittens hi player naupang hmabak eng tak ni mah se, Dortmund head coach Niko Kovac-a khelhpui danah hmun a chang tam dawn lo a, hei vang hian Dortmund pawhin an ui ta lo a ni.

Gittens hi England senior team-ah a la inlan lo a, Thomas Tuchel-a hnuaia 2026 World Cup khelh ve ngei a tum avangin inkhelhna hmun a chan tam theihna tur a pan dawn ta nia tarlan a ni bawk.

Chelsea chuan loan-a an hawh Jadon Sancho chu a ngheta lak an tum lo a, hei vang hian Gittens-a lam an hawi ta nia tarlan a ni.

Bayern Munich pawhin Gittens hi an lo ngaihven tawh a, hetih lai hian England lama kir leh zai a rel ta zawk a ni.

Manchester City youth team atangin Gittens hian kum 2020 khan Dortmund a pan a, German club tan hian game 106 a khel ve tawh a, kum 2028 thleng contract a nei.

Season liamta khan a rawn chetha hle a, Dortmund tan competition hrang hrangah goal 12 a khung a, Champions League-ah pawh goal 4 a khung ve bawk.