Chelsea chu tunah hian FIFA chuan player lalut thei lo turin a hrem meka, tun nipui bazar hunlai pawh khan player lakluh phalsak an ni tawh lova, nakkum thlasik bazar hunah hian hrem an la ni zel dawn em tih a la hriat loh.

FIFA hian Chelsea hi transfer window vawi hnih bazar thei lo turin an hrema, a nihna takah chuan thlasik bazar hun lo awm mai tawh turah hian Chelsea hi bazar thei lo tur ni mahse Chelsea hian an khinglet meka, thuneitu sang zawkin FIFA hremna hi an pawh tawi sak thut thei.

FIFA in an hrem chungchangah Chelsea hi Court of Arbitration for Sport (CAS) hnenah an zualko meka, tunah hian Chelsea thuneitu thenkhat chu CAS lam nen inhmu in Switzerland-ah an awm mek.

CAS thutlukna hi ni tun atanga ni 14 atanga ni 21 chhung velin a hriat theih a rinawma, December thla chawhma lam chuan Chelsea dinhmun tur hi hriat a nih ngei tawh a rinawm hle.

Chelsea hi kum tling lo player an lakluh danah FIFA dan an bawhchhia niin FIFA chuan a ngai a, transfer window vawi hnih bazar thei lo tura hrem an nih bakah pawisa fai eng emaw zah chawi tir an ni bawk.

Chelsea hian tun nipui chhung khan player lalut thei lo mahse beisei phak bakin manager thar Frank Lampard-a hnuaiah an che tha a, tunah hian Premier League table-ah 3-naah awmin, pahnihnaa awm Leicester City nen an point a inang chiaha, hmahruaitu Liverpool chu point 8 in an pha lo mek a ni.