Stamford Bridge-ah Chelsea chuan Fulham an mikhual a, mual neitu lamin si hnih faiin hnehna an chang.

Chelsea tan Joao Pedro leh Fernandez ten goal an khung a, goal hmasa zawk hi first half tawp dawna lut niin, Enzo Fernandez-a corner pet chu Pedro chuan a tauh goal.

Second half tir lamah Sessegnon-a handball avangin Chelsea chuan penalty an hlawhchhuak a, he penalty hi Enzo Fernandez chuan goal-ah a chantir a, si hnih faiin hnehna an chang.

Joao Pedro a tal na hle a, hun tawp dawnah a goal hnihna a khung teuh hle a, hnai tak aṭanga a shot chu Leno chuan a lo dan sak a, goal an chhuahtur pawh a lo dang a, Andersen tauh chu goal line aṭangin Pedro hian a lo dang a ni.

VAR THUTLUKNA FULHAM-IN TUAR

First half minute 21-ah Fulham chuan counter attack an nei, Joshua King chuan goal a khung. Referee Robert Jones chuan VAR a rawn a, Fulham goal a pawm lo tlat mai.

Halfwayline-ah Muniz chuan Chalobah a bum a, a ke a rah sak palh. Hei hi referee chuan foul hamna tlakah ngaiin, foul a ham ta a, Fulham goal a pawmsak ta lo a ni.

Second half-ah Fulham lamin Sessegnon handball avangin penalty an chawi. Kha thil a thlen hma chiah khan box chhungah Pedro pawh a handball ve tho a, referee chuan Sessegnon-a handball zawk chu a ham ta hlauh a, Chelsea-in an goal hnihna an khung phah ta a  ni.

FULHAM HEAD COACH SILVA A LAWM LO HLE

Inkhelh zawhah Fulham head coach Silva chuan, "Thutlukna mak tak a ni, football fan ka ni a, manager ka ni a, player ka lo ni tawh bawk a, kha thutlukna kha chuan min tilungngai hle a ni.

"First half kan khel ṭha em em a, VAR thutlukna kha danglamna siamtu a ni. Second half erawh kan khel ṭha em em lo, kan nih tur ang kan ni phak lo a ni.

"Thutlukna siam kawngah chuan kan thu lo em a ni tiin ka player-te hnenah ka sawi thlawt. Kan goal kha engtin nge an pawm loh theih? A mak lutuk hi a ni tawp mai. Kan tawn ang kha tawng ve selang chuan Enzo pawh kha a lawm hauh lo ang.

"VAR hi kan inkhel enkawltu tur a ni lo. Inkhel enkawltu referee-in thutlukna siam harsa a tihah chauh a rawn mai tur a ni. Kan goal an han pawm lo kha chu a mak ka ti tak zet a ni.

"Sawi tur ka ngah lutuk, mahse ka sawi vek chuan min hrem leh a ni ang a, chuvang chuan ṭawng tam loh a him. Inkhelh dawt leha bench-a awm ka duh a, pawisa chawi ka duh lo bawk. Season ṭantir aṭangin khatiang kha kan han tawng ṭan chu a ni a, a hautak chho dawn khawp mai," tiin a sawi.

LIAM DELAP A INHLIAM

Tun nipui bazar inhawn laia Chelsea-in an striker lak thar Liam Delap chu hamstring hliam avangin first half-ah lak chhuah a ni a, engtia rei nge a chawlh dawn tih sawi lawk theih a la ni mai lo.

Inrinni khan Bayern Munich lamah an forward Nicolas Jackson chu an kaltir a, ani hian Munich a thleng vek tawh. Mahse Delap a inhliam tak si avangin, loan-a Bayern Munich-in hawh an tumna chu an sut leh ta a, Jackson hi Chelsea chian London-ah a ko kir leh ta a ni.