12 Jan 2019 02:09

inkhel

​Chelsea atangin Fabregas a chhuak

Chelsea midfielder Cesc Fabregas chuan Ligue 1 club AS Monaco a zawm fel ta a, Arsenal-a a lo khelhpui thin Thierry Henry-a hnuaiah a khel dawn.

Chelsea-ah Fabregas hian tun season bak contract a nei tawh lova, kum 30 a lo pel chho  tawh nen Chelsea hian contract thar ziah pui lovin an chhuah tir ta zawka, nipuia a thlawna chhuah tir mai aiin tun thlasik nipui lai hian Spaniard midfielder hi man neiin an chhuah tir ta zawk a ni.

Monaco hian Fabregas-a manah hian pound maktaduai 10 vel an seng niin chanchinbu miten an tarlanga, Monaco-ah hian kum thum leh a chanve daih contract a ziaka, jersey no.44 a ha ang. Kum 31 mi Fabregas chuan Monaco a zawm chungchang sawiin, “AS Monaco ka zawm thei hi ka lawm hle a, ka tan chuan chona thar a ni.

“Coach naupang tak hnuaiah player naupang tha tak tak awmna hmun a ni a, team pui turin ka rawn lut. Bul ka tan chak tawha, tun Sunday lo awm tur hian Marseille lakah game pawimawh tak khelh tur kan nei a, ka phur tawh hle a ni,” a ti.

Tunah hian Monaco hi an che chhe hle a, Ligue 1 table-a 19-naah an awm mek. An manager banin season lai laklawhah French striker ropui Henry an la a, Henry-a hnuaiah pawh eng an la ang thei lo.

Fabregas hian tun inrinni liamta khan Chelsea tana a game hnuhnung ber khelin FA Cup-ah Nottingham Forest a hmachhawn. Barcelona academy chhuak niin, kum 2003 khan Arsenal a zawma, Arsenal-ah hian hun rei tak chamin captain hial a ni hmana, kum 2011 khan a lo chawrchhuahna Barcelona lam a pan leh.

Barcelona a pan hi a tifuh lo a tih theiha, trophy chawi hnem mahse a that zia enin a khel tlem hle. Kum 2014 khan Chelsea-in lalut ve lehin a season hmasaberah Chelsea chuan Premier League title an la nghal a, kum 2016-17 season khan Chelsea hi Premier League title dang a lakpui leh bawk. Tun season-ah manager thar Maurizio Sarri hnuaiah inkhel tlem hle in, a contract a lo zo hnai tawh nen, Stamford Bridge a chhuahsan zui ta a ni. Premier League title pahnih bakah Fabregas hian Chelsea chu FA Cup leh League cup pakhat ve ve a lakpui hman bawk.

Fabregas hi English Premier League-a Spanish player awm tawh zinga ropui ber pakhat a ni a, a career chhungin a ropui tur angin a ropui lo thung. Arsenal-ah tha taka khelin sawi tawh angin captain hial kum naupang tak chungin a ni a, mahse a lo chawr chhuahna Barcelona a pansan. Hemi hnu atang hian thil a fuh lo chho va, Barcelona-ah duh angin a khel tam lo. Andreas Iniesta leh Xavi-te an awm avangin bench-ah a awm ngun hle a, a khelh chhunah erawh a khel chhe ngai lem lo. National team lamah pawh a vanduai kan ti dawn a vennei ka ti dawn tih hriatthiam a har a, Barcelona-a a nek chhuah zawh loh tho Iniesta leh Xavi-te tho chu an awm leh avangin ram tan pawh duh angin a khel tam tawk lo.

Fabregas-a passing that zia hi kan hre theuh awm e, ani ang hi football khawvelah an tam lova, mahse Xavi leh Iniesta-te nen an vanglai an hmang ho hi Fabregas-a tan chuan a vanduai pawh a tih theih awm e. Barcelona kha pan lovin, Spain lamah Iniesta leh Xavi-te nen awm ho lo bawk sela chu Fabregas hi tun aiin ngaih ropui a hlawh lovang tih a sawi theih lova, midfielder tha ber zinga chhiar tel a ni lovang tih pawh a sawi theih loh a ni.