06 Dec 2018 11:32

inkhel

​Chelsea an tlawm, Spurs in an lehpel

Premier League inkhelah Chelsea chuan Molineux Stadium-ah Wolves an tlawha, Chelsea hian hma hruaiin hmasa in chak zawk tura ngaih pawh an ni a, mahse mual neitu lamin an lehthal a Wolves chu 2-1 in an chak.

Chelsea hian 18mins-ah hma an hruai a, goal khungtu hi Ruben Loftus-Cheek a ni a, Wolves hian second half-ah Blues hi lehthalin, Raul Jimenez leh Jota-te chuan goal an khung.

Chelsea hian inrinni zanah hmahruaitu Manchester City an tum leh nghal dawn a, hemi a nih avang hian manager Maurizio Sarri chuan an player hman rim tak Jorginho leh David Luiz-te chu chawlh hahdam tirin, Jorginho aiah Cesc Fabregas a hmanga, Luiz aiah Andres Christensen dah a ni bawk.

Chelsea hian 18mins-ah hma an hruai a, mual veilamah ball inpe kualin, Loftus-Cheek chuan box pawn chiah veilam atangin goal-ah a pet a, Wolves defender Coady chuan lo tauhin, goal-ah a lut zui. Hemi hnu lawk hian Willian chuan Blues tan goal a thun belh teuh hle a, free kick atangin ball a chhuiha, Wolves goalkeeper Rui Patricio chuan a lo save tha hle.

Chelsea hian striker hriam an neilo an tuar chho mek pawh a tih theih a, striker manto goal khung harsat tak Alvaro Morata chuan hma a sawn hleithei lo a ni ber. Second half-ah Wolves hian an si phurh an sut a, Jimenez chu tha taka through ball pek niin, Jimenez hian box chhungah a khalh luta, box chhung dinglam atangin lei hrulah petin khawvela goalkeeper manto ber Kepa Arrizabalaga kap karah lutin, a goal zui. Hemi hnu lawk hian Wolves hian goal an khung belh leh nghal a, box chhung dinglama tlan lut Doherty chu ball pek niin, ani hian lei hrulah ball a cross a, tuma chan loh Jota chuan goal-ah a lo chantir zuia, Wolves chakna goal a ni bawk.

Inkhel dangah London club dang Tottemham inlanin, Wembley Stadium-ah Spurs hian Southampton an lo mikhuala, Spurs hi 3-1 in an chak. Spurs tan Harry Kane, Lucas Moura leh Son Heung-min te chuan goal an khunga, Soton tan Charlie Austin chuan hun tawp hma lawkin a khung ve bawk.

Chelsea hi an chak lova, Tottenham an chak thung avangin Chelsea chu palinaah an tla thla a, Tottenham hi palina atangin pathumnaah an chho ve thung. Chelsea hian khelh 15 atangin point 31 hlawhchhuak tawhin palinaah an awm a, pathumnaa awm Spurs hi point hnihin an pha lova, an hnuai chiaha awm Arsenal nen an point hmuh zat a inang chiah. Chelsea hnehtu Wolves hian khelh 15 atangin point 19 an hlawhchhuak tawha, 12-naah awmin, Spurs laka tlawm Southampton erawh relegation zone atangin an la tal chhuak hleithei lova, khelh 15-ah point kua hlawhchhuak tawhin 18-naah an awm mek a ni.