10 Aug 2018 11:27

inkhel

​Chelsea an ‘Sarrismo’ thei dawn em? Part-2

Sarri-a hming chawi meuha tactic hming phuah a nih avangin Sarrismo kan sawi bik a ni a, duhsak bik lam a ni lo tih kan hriat tlan a tha.

Part-1 post siam a nih tawh a, part-1 lamah khan defence chin sawi a ni a, he post-ah hian midfield atangin kan chhunzawm dawn a ni.

Post hmasa lama sawi tawh angin Sarri hian 4-3-3 formation a hmang bera, Napoli lama a midfied-ah hian Jorginho, Allan leh Marek Hamsik-te an inkawp.

Midfield pathum zingah hian a lai takah Jorginho hi deep-lying playmaker anga dah a ni a, ani hian game a kaihruaiin a khaikhawm. Chelsea tan heta khel tur hi buaina a awmlo, pu berin Jorginho a rawn chhawm lut a ni.

Jorginho hi defensive midfield-ah khelin Andrea Pirlo ang deuhin game a kaihruai a ni bera, pundit-te pawhin Pirlo nen an lo khaikhin fo tawh reng a ni.

Napoli-ah hian Jorginho hma chiahah Brazilian thahrui ngah tak Allan a awma , ani leh Kante khaikhinna hi post hranah kan ziak tawh a , Allan hi box-to-box midfielder angin a khel a, defence a puia, goal nawr lam pawh a pui hneh hle bawk. Napoli tan Allan a pawimawh hle a, Serie A-a an game zawng zawng a khel kim nghe nghe a ni

Season liamta khan Allan hian Serie-A-ah tackle a ngah bera, lehlam pawl ball chhuhsaktu ber a ni bawk a, Kante-a khelhdan mitthlaah a lang nghal a ni. Kante hian season thum liamta atang khan vawi 913 lai lehlam pawl ball a chhuhsak tawh a, Premier League-ah hei aia sang hi an awm lo.

Kante hi Allan ang chuan goal nawr lamah a hlauhawm tawk lo maitheia, mahse Sarri hnuaiah hian nasa takin hma a sawn thei a ni. Kum tinin Kante hian hma a sawn zia a langa, England-a a rawn insuan tirha ball chhuhsak lam ngawr ngawra tha kha a ni tawh lo. A passing a tha tawh hle a, a game pawhin awmzia a neizual tawha, ani aia tangkai hi khawvel pum huap ang pawhin midfield-ah an awm kher lo maithei. Sarri-a game khel tur hian Kante-hi Napoli-a Allan-a khelhna leh khelhdana khel turin duhthusam a ni hial maithei a ni.

Napoli-ah Allan-a bulah hian Napoli captain Marek Hamsik a awm ve leh thung a, ani hi attacking midfielder angin a khel mah zawka, goal nawr lam a pui nasa hle thung. Kan hriatthiam dan tur chuan, Allan aiin Hamsik hian goal a nawr naa, mahse Allan aiin defence a pui tlem zawk.

Heta khel tur hi Chelsea buaina a ni a, Ross Barkley a khelh a rinawm ber laiin, nimin khan Chelsea chuan loan-in Real Madrid midfielder Mateo Kovacic an lalut a, Sarri-ball khel turin Sarri a ‘puzzle’ a kim tawh pawh a tih theih awm e.

Kovacic hi Hamsik ang bawka ball keng thei leh ball tlan pui thei a ni a, Kovacic hi Hamsik aiin ball a thiam hial zawkin a lang bawk. Kovacic hi England-ah a insiamrem phawt chuan a che vel a hmuhnawm hle dawn a ni.

Forward lam kan sawi kai tawh dawn a, Napoli-ah Sarri chuan left-wing-ah Lorenzo Insigne dahin, right-wing lamah Real Madrid player hlui Jose Callejon a daha, a laiah hian Belgian player Dries Mertens a dah thung.

Left-wing-ah hian Chelsea-in Eden Hazard an nein a, buaina tur a awmlo, Isigne ai pawha he ‘role’ hi hnehsawh tura rin a ni. Sarrismo-ah hian left-winger hi ball laluta, cross emaw goal-a pettu an ni bera, Hazard-a thatna tak pawh a ni a, a shooting erawh tun aia hma a sawn a ngai hle a ni.

Right-wing-ah hian Chelsea-in Willian an nei a, ani hi kum 30 ni tawh mahse Barcelona-in to takin an dawra, mahse London club hian an chelh a, Sarri-a’n a hmang rim dawn tih a hriat mai. Callejon-a khelhnaa khel tura duhthusam a ni a, a khelh that chuan Willian hi defender-te tan a huphurhawm hle.

Striker / centre forward-ah hian Chelsea an pan hle dawnin a langa, Alvaro Morata, Olivier Giroud-te an neia, Michy Batshuayi awm mahse ani hi chu loan-a a chhuah ngei a rinawm thung. Sarrismo khel turin a tu ber hi nge Sarri hian a thlan ang tih hriatthiam a har hle.

Morata hi Chelsea player manto ber dawttu a ni a, first-choice tura an lei pawh a ni, mahse Sarri-a game hi tun dinhmunah chuan a khelh theih a rinawm loh hle. Giroud hian Engish game chu a man hle a, mahse Mertens ang chi a nilo tih a chianga, mahse Morata aiin a tangkai zawkin a langa, Sarri pawh hian a hmang lovang tih a sawi theih loh.

Mertens hi a nihna takah chuan winger a ni a, mahse Napoli-ah striker Milik a inhliam avangin Sarri hian Belgian player hi ‘forward’ tha takah a chher chhuaka, Milik dam hnu pawhin Mertens hian hmun lailum a luah chhunzawm.

Chelsea hian striker-ah Mertens ang chu an nei lo chiaga, mahse Sarrismo khel tur hian Mertens ang chiah an mawh pawh a ni chuang lo. Chelsea player naupang Callum Hudson-Odoi hi pre-season-ah a khel tha hle a, Sarri hian Mertens angin striker-ah a chher ve thut theia, a nih loh pawhin Odoi hi left-wing-ah dahin Hazard zawk hi Mertens anga khel turin a dah thei a ni.

Rinthu vek a ni a, naktuk atangin Premier League season tan a ni tawh dawn a, Chelsea hian Huddersfield an hmachhawn dawna, la hma viau mahse season thara Chelsea khelh dan tur eng emaw chen chu an match hmasaber atang hian a hriat dawn a ni.