Cesc Fabregas chuan a club khelhna thin pahnih inkhel turah Arsenal chu a duhsak zawk thu sawiin, FA Cup final-ah Gunners chu chak zawk se a duh thu a sawi.

Kum 33-a upa Cesc Fabregas hian 2003 leh 2011 inkarah khan Arsenal tan a hun a hmang thin a, 2014 atanga 2019 chhung khan Chelsea tan a khel ve leh a. Team pahnihte hi trophy a lakpui hman ve ve a ni.

Naktukah Arsenal leh Chelsea te chu FA Cup final-ah an inkhel dawn a, an inkhelh hma hian an player hlui Fabregas chuan final tur hi a lo thlir lawk a, a khelh hmasakna zawk hi a duhsak thu hi a sawi a ni.

Fabregas chuan tun hnaiah Chelsea chuan trophy an la nual tih sawiin, Arsenal chuan trophy an la khat zawk a, hei vang hian FA Cup final an khelh hunah pawh Arsenal chu chak tura a duhsak thu leh, trophy lak mamawh zawk nia a hriat thu a sawi chhuak.

Spanish midfielder Fabregas hian FA Cup hi vawi hnih a lo la ve tawh a, 2005 kumah khan Arsenal a lakpui phawt a, 2018 kumah khan Chelsea chu a lakpui leh bawk a. Tunah chuan Ligue 1 club Monaco lamah a hun a hmang mek a ni.

“Arsenal hian trophy chu an mamawh zawk daih a, trophy an la khat a, an tan chuan lak ngei hi a pawimawh lehzual a. Chelsea chuan kum tin deuh thaw trophy hi an la a, an tan chuan chuti takin a pawimawh lo zawk,” tiin Fabregas chuan a sawi.

“A nihna takah chuan Arsenal an champion thei a nih chuan season tharah an tan Europe khawmualpuia inlan ve theihna hun tha a awm dawn a. Chelsea te chuan UEFA Champions League an khel thei dawn a, Arsenal tan beisei tur dang a awm lo thung,” a ti bawk.

London hmar venga a awm laiin Fabregas hian Arsenal chu trophy pakhat chiah a lakpui thei a. Chelsea a zawm hnuah erawh vawi li chu trophy a lakpui thei a ni.

Chelsea in trophy an lak hnuhnun ber chu Europa League trophy niin, Baku ah Arsenal chu 4-1 in an hneh a. Arsenal trophy lak hnuhnun ber ve thung chu 2017 khan niin, FA Cup ah Chelsea chu 2-1 in an hneh a ni.