Chelsea-ah Lemar a kal maithei

10th January 2020, 03:01PM

Chelsea chuan Atletico Madrid atangin French winger Thomas Lemar chu tun nipui chhungin lakluhna hun tha an nei mek niin a langa, Frank Lampard chuan winger a melh deuh bawk nen Lemar hi London-ah a insawn thut lovang tih a sawi theih loh.

Lemar hi Atletico Madrid-ah a insiamrem thei meuh lova, tun thla tir lam khan Atletico manager Diego Simeone chuan Lemar hi an hnena a insiamrem theih loh avangin a chhuak maithei tih thu a lo sawi tawh nen Lemar hi tun thlasik bazar chhung hian a chhuah a rinawm viau.

Atletico zawk hian an winger hi chhuah tir dan an ngaihtuah niin a langa, tunah pawh hi Chelsea hnenah Lemar hi an zuar niin chanchinbu mite chuan an tarlanga, Chelsea chu loan-in Lemar lakluh tir an tum mek anga tarlan a ni.

Tun season kal mekah Lemar hi vawi 21 inlan tawhin goal khat pawh a la khung lova, manager Simeone pawhin duhsak lo zelin Lemar tan hian chhuah mai a finthlak dawna, Chelsea-ah a kal lo a nih pawhin tun thlasik bazar chhung hian loan-a club dang a zawm ngei a rinawm.

Atletico hian kum 24 mi Lemar hi thla 18 kalta mai khan AS Monaco atangin an laluta, a manah pound maktaduai 51 lai seng mahse beisei angin Lemar hi Atletico tan a la khel meuh lo tih theih a ni.

Atletico hian player thar lakluh nan Lemar hi chhuah fel tir thuai an duh nia sawi a ni a, Chelsea hian a hma in Alvaro Morata chungchangah Atletico nen an lo indawr tawh nen, club pahnih te hi an indawr tluang rih viau niin a langa, Lemar hi Stamford Bridge-ah a input luh mai pawh a rinawm chho hle a ni.

Copyright © inkhel.com 2024. All rights reserved.