Eden Hazard chuan Chelsea chhuahsan a chak thu a sawi ri fo a, Real Madrid pan a duh thu a sawi zeuh zeuh a. Tun hnaiah chuan Chelsea-ah a hun zawng zawng a hmang mai thei niin a sawi leh tawh.

Thla 12 vel kalta atang khan Eden Hazard hi Santiago Bernabeu nen an sawi zawm tan tawh a, Los Blancos in Juventus hnena Cristiano Ronaldo an hralh hnuah phei kha chuan thawm a ring chho viau a ni.

Hazard hian Stamford Bridge chhuahsana European champion zawm chu a chak thu a sawi ri fo a, hei vang hian Belgium star hian Chelsea a chhuahsan ngei a rinawm viau hman a. Mahse, tun hnaiah Hazard chuan a beisei angin thil a thleng ta lo a nih pawhin vuivaina a neih loh tur thu a sawi a, Real Madrid a pan ta lo a nih pawhin lungawi takin Blues tan a hun zawng zawng a hman tur thu a sawi.

Belgium star hian Chelsea chu Premier League title vawi hnih a lakpui tawh a, North London a awm chhunzawm zel chu pawi a tih loh thu sawiin, Stamford Bridge atanga football chawlhsan pawh a hreh hauh lo niin a sawi a ni.

“Chelsea-ah hian ka hun zawng zawng ka hmang mai thei a. Ka tan engmah harsatna a awm lo a. He club-ah hian ka hlim a, ka khelhpuite bulah hian ka lung a awi tawk em em bawk a. Chu mai a ni lo a, ka chhungte pawhin helai hmun hi nuam an ti hle a ni,” a ti a.

“Spain lam ka pan ta lo a nih pawhin pawi tihna ka nei dawn hauh lo a. Chelsea fans te hi ka ngaina a, anmahni pawh hian min duh ve hlein ka hria a. Ka hma lam huna thil thleng tur chu ka hre chiang a, ka hlim zel dawn tih hi ka chiang a, chu bak a awm lo,” a ti bawk.