12 Jul 2018 10:05

inkhel

​Chelsea-ah Jorginho kal dawn

Chelsea chuan tun nipui bazar-ah lakluh an la nei lova, kum dang ang lo takin an thawm a zawi hle. Club dang an bazar sup sup tawh laiin Chelsea chuan thawm pawh an nei mang lova, an player lei thar hmasa ber ni turin Napoli midfielder Jorginho an lalut dawn niin Sky Sports chuan a tarlang.

Jorginho hi Manchester City-in lak an tum nasa hle a, media tam takin an lalut dawn ang pawhin an ziak hman. Engmah thu chiang a awm thei lova, Chelsea lam hian an lalut dawn ta zawk niin a lang.

Bazar nan thla khat pawh a awm tawh lova, Chelsea hi July thla ni 23 hian Australia-ah pre-season khel turin an kal dawna, engkim tih fel a nih thuai a rinawm.

Chelsea hian Champions League an khel pha lova, khel pha tura an beih dawn chuan player thar an lakluh a ngai a, Jorginho bakah hian Russia player naupang Golovin leh Juventus defender Rugani-te nen pawh sawi zawm an ni.

Jorginho hi Stamford Bridge-ah hian vawiin lam hian a luh hman beisei a ni a, engmah thu chiang a la awm lova, eng pawh thleng thei reng a la ni.