Belgian midfielder Eden Hazard chuan hunrei tak chhung Chelsea-a khelh a duh tih a sawi a, Champions League-a champion pawh a suangtuah thin thu a sawi bawk.
Kum 24 mi Hazard hi tunhnaia transfer hun inhawn apiangin French club PSG nen sawizawm thin an ni a, mahse he thawm hi a reh tawh a London club-ah hian a nghet niin tarlan a ni.
Tun season-ah The Blues hi Premier League leh Capital One Cup nomawi a chawipui a, hei bakah hian mimal angin chawimawina a dawng hnem hle bawk.
Kumin February thla khan Chelsea tan hian kum 2020 thleng daih tur contract a ziahbelh a, hunrei tak chhung chu Chelsea hian an la kawl dawn niin a lang.
Standard Sport-in an kawmnaah Chelsea tan hian hunrei tak chhung khelh a tum em ti a an zawhna chu Hazard hian chhangin, "Engah nge club ka thlak ang? Hmun khatah kan hlim a engkim a dik chuan thlak kher a ngailo."
"Diktak chuan engmah hi ka kutah chuan a awm lo, mahse tha taka khelhlai a nomawi chawih theih bawk chuan hmundang pan chu thil atthlak a ni ang." tiin a sawi.
Hazard hi tun season Premier League-a player rim ber niin a lakah hian an tumpuite an foul hnem ber a, hei vang hian referee-in an chhan theih deuhna tur lama a kal mai Jose Mourinho pawhin a hlauh thu a sawi tawh.
Mahse hei vang hian England chhuahsan a tum hran lo tih a sawi a, “Chhan chu ka mamawh pawh a ni maithei e, mahse hei hi English football that riauna a ni a league dang laka a danglamna a ni bawk."
"Tupawh hi an rum a indona mual ang maiin an che thin. Keipawhin ka khelhdan ngai rengin ka khel chhunzawm ang. Ka bei ang a fans-te hlimna siamin thiante pet goal tura siamsak leh goal khungte pawh ka tum zel dawn a hetah hian ka in sawrbing ang."
"Min beihnate hi ka do zo a, buaina tham a nilo. Ka hrethiam a boxer ang maiin min beihnate hi ka dawl zo a ni." tiin a sawi.
Kum 2012 khan Chelsea hian £32m sengin Hazard hi French club Lille atangin an lei a, Champions League-a an champion hnuah a ni.
Sawi chhunzawmin Hazard chuan, "Champions League hi ka nuna thil pakhat la kim lo chu a ni. He intihsiakna sulhnu leh hlawhtling player-te ka en hian player thate chuan an lo chawi vek tawh. Hei vang hian player tam tak chu player ropui ti a hriat phah an ni."
“Keipawh hian player tha tak nih ka duh chuan Champions League-a champion hi ka duh. A awlai dawn lo, intihsiakna hautak a ni a kawng thui tak zawh tur a awm. Mahse kan club hi kan champion thei a hei hi kan tum reng tur pawh a ni."
"Champions League-a champion boruak hi engtiang taka nuam tur nge ka suangtuah thin a, kan champion theih a beiseiawm. Season khata nomawi pali chawi chu thil khirhkhan tak a ni ang, kumtin hian Champions League-a champion kan beisei a kum tinin a danglam lo."
“Tupawh lalut ila a hma ang thoin kan lo lawm vek ang, League leh Champions League thlir chuan player mamawh a nasa a, thil tha a ni a hei vang hian player tha tak an ngai." tiin a sawi.