Radamel Falcao leh Juan Cuadrado te chu tunah hian Colombia tan Copa America an khel mek, Falcao chuan Chelsea a zawm dawn chiang ta a, engkim peih fel a ni thawkhat ta a, tunkar chhung hi chuan Chelsea player a nih hman rin a ni.

Colombia National team coach Jose Pekerman chuan Cuadrado leh Chelsea player ni mai tur Falcao te chu Stamford Bridge-ah hlawhtling taka an khelh a rin thu sawiin,"An inkawp fuh ngei ang, an intanpui tawn anga, an hlawhtling ngei ang tih hi ka ring tlat a ni," tiin a sawi.

Kum 29 mi Falcao hian season liamta khan loan-in Monaco atangin Manchester United a zawm a, game 29 atangin goal 4 chiah a khung. Inhliamin a tlakbuak avangin hun rei tak a chawlh hnuah Man Utd tan a khel a, a che tha lo hle. Manchester United chuan Falcao hi chhawr chhunzawm an tum ta lova.

Hetih veleh hian Chelsea manager Jose Mourinho chuan Falcao chu ngai awh leh tura a enkawl theih a inrin tlat avangin Monaco atangin loan bawka kum khat chhung hawh a tum ve ta a. Cuadrado hi Colombian niin, kumin February thla khan Fiorentina atangin Chelsea chuan £23.3m in an lei a. Season chawhnu lamah Chelsea tan thawh hlawk lem lo mahse Chelsea player tangkai tak la ni thei tur niin a lang.

Chelsea manager chuan kum 27 mi Cuadrado chuan Chelsea-a insiamrem turin hun a mamawh thu a lo sawi tawh a, ram tana a khelh pui Falcao-a'n Stamford Bridge a pan dawn tih a lo hriat chuan Cuadrado a lawm hle a, "Kan team-ah a rawn kal dawn tih ka hriatin ka lawm hle a, mahse tunah rih chuan pawimawh ber chu Copa America lama rilru zawng zawng dah a ni." tiin a sawi.

Falcao hian Atletico Madrid tan ropui takin a khel a, (2011-13) season chhung khan game 86 atangin goal 68 Atletico tan a khung. Monaco chuan 2013 khan £50m laiin an lalut a, game 20 atangin goal 11 a khung hman a, inhliamin a tlakbuak bakah a hlawh a tam em avangin Monaco chuan Man Utd lamah loan-in an kal tir a, 2014-15 season chhung kha chuan a che tha lo hle a, United tan game 29 atangin goal 4 chiah a khung thei a ni.

source : express