Chelsea captain Cesar Azpilicueta chuan Stamford Bridge-a cham zel turin kum li daih contract thar a ziaka, Blues tan kum 2022 thleng khel tura ngaih a ni.

Spanish defender Azpilicueta chuan contract thar a ziah chungchang sawiin, “He hmunah hun rei zawk cham zel tura contract thar ka ziak hi ka lawm hle a, ka lo luh tirh atangin he club hi nuam ka ti a, ka mawhphurhna ka hre nghal bawka, chuvang chuan khelmual chhungah theihtawp ka chhuah thin. Hmalam hun eng tak kan neih zel ka beiseia, Chelsea hi an awmna hmun pangaiah hlan chhoh leh ngei ka duh a ni,” tiin club website a hrilh.

Chelsea director Marina Granovskaia chuan club website hnenah an captain chungchang hi sawi ve in, “Cesar hi kan player kawl rei tawh berte zinga mi a ni a, kum ruk chhungin kan lakluh fuh zia kan hmu. Khelh chhiat a nei ngai lova, Chelsea player pawimawh ber zingah a inhlang chho bawk.

“He contract thar  hi a hman zawh chuan Cesar hi Chelsea-ah kum 10 a awm dawn tihna a ni a, kan hma hunakan hlawhtlinna kawngah pawh a thawhhlawk ber zinga mi a nih chhunzawm zel ka beisei a ni,” a ti.

Kum 29 mi hian kum 2012 khan French club Marseille atangin Chelsea hi a zawm a, Chelsea tan game 298 a khel tawh. Ashley Cole chhuah hnuah Chelsea-in Azpilicueta hi left back-ah an hman rim leh hmasak ber a ni a, defence line-ah khel thei vekin, centre-back lam thlengin a chhawr theih.

Chelsea-a a cham chung hian Azpilicueta hian Premier League title pahnih, FA Cup pakhat, League Cup pakhat leh Europa League title pakhat a chawi tawh a ni.