Spain coach Luis Enrique chuan Alvaro Morata chu Chelsea-a a awm lai aiin tunah a that tawh zawk thu a sawiin, EURO Qualifiers-a Norway an hmachhawn chungchang pawh a sawi tel.

Morata hian kum 2017 khan Real Madrid atangin Chelsea a zawm a, Chelsea a zawm hnuah beisei a pha lo em em a, a man phu in a khel lo. A season khatnaah che tha lo hle mahse Chelsea chuan tun season-ah Morata hi an la kawl chhunzawm a, manager thar hnuaiah pawh beisei a phak theih chuang loh avangin kumin January thla khan Atletico Madrid lamah an chhuah tir.

Atletico a zawm hnuah Morata hian goal hnih chiah a la khunga, mahse Enrique erawh chuan hma a sawn ngei niin a hre thung. Enrique hian tun international break hman mekah pawh kum 26 mi Morata hi kovin, inkhel bul pawh a tan tir nghe nghe.

Enrique chuan Morata chungchang sawiin, “ Chelsea-a a awm lai ai khan tunah a tha tawh zawka, kan tan khel chhe ngai lem lo mahse hma a sawn belha, ball pawh a kawl thei tawh hle. Kan game hnuhnung berah pawh chance a ngah angrenga, a inringtawk tih pawh a lang.

“A vannei tawk lova, mahse a khel tha a, kan tana a khelh that ber tum a ni hial ang. Team ang pawhin kan khel tha a, Norway khan set-piece atang si min phurh tir tum mahse inkhel kan thunun a ni.

“Khatiang tak khan inkhel kha a awm dawn tih kan ring sa a, ka team-te khelh danah ka lawm. Kan chance neih chanve vel tal kha chu goal-ah chantir thei ila chu ka ti a, sawizui pawh a hlawh ngei ang. Hma kan la sawn thei a, player-te hi an inrintawk zel a ngai bawk a ni,” a ti.