26 Jan 2016 02:50

Inkhel

Mizo Sports Website hmasa ber

Hollow, Tuikual South Youth, Mischieves leh Panthers-te an chak

Hawla Indoor Stadium, Republic Vengthlanga MBBA League 2016 khelh mekah vawiin (Thawhtanni) khan Hollow, Tuikual South Youth, Mischieves leh Panthers-ten an khingpuite theuh an hneh.

Inkhel hmasa ber Division II-ah Tuikual South Youth chuan 97-49 in Zotlang an sawp a, Julian Lalmalsawma chuan point 15 thunin mimala chetha ber a ni a, Tuikual South Youth hnehna a chanpui.

Tuikual South Youth team hian quarter tir atangin inkhel an thunun nghal a, half time-ah 40- 26 in an fal hman. Quarter thumnaah basket a tlem deuh a, Zotlangin point 8 chiah an thun belh a, Tuikual South Youth pawhin point 15 chauh an thun belh thei. Quarter hnuhnung berah Tuikual South Youth team-in point 24 an thun belh laiin Zotlangin point 18 chauh an thun a, Tuikual South Youth-in an hnehna zat point chu 30 zet a tling ta a ni.

Mischieves chuan 73-57 a Chaltlang hnehin mimala chetha leh score sang fal an awm lem lova, team game hmuhnawm tak min hlui. Mischieves-in bul an tan tha a, 20-8 in 1st quarter an la nghal. Quarter hnihnaah basket nei tlem zawk mahse halftime-ah 26-17 in hma an hruai. Quarter thumnaah Chaltlang game a kang hret a, point pawh an thun hnem zawk., Mahse quarter linaah Mischieves an fal chho ta hle a, point 28 zet an thun belh tak avangin a tawpa an inthlauhna chu point 16 a tling a ni.

Division II inkhel hnuhnung berah Panther leh Zappers an innehtawk hle mai a, a tawpah point 1-in Panther an chak ta hram a ni. Player chetha leh thun tam fal an awm lova, half time-a an dinhmun chu Panthers 25-21 Zappers a ni. Quarter thumnaah Panther hian point thum chiah an thun thei a, chak lo thei dinhmunah ding mahse quarter hnuhnung berah thapui thawha point 16 an thun belhna chuan hnehna a chantir ta hram a ni.

Inkhel hnuhnung ber Division I-ah basket a tam hle mai a, team pahnih Hollow BBSP leh Chawnpui VR4 te thun belhkhawm chu 167 zet a tling a, a tawpah 84 - 83 in Hollow an chak ta hram. Hollow tan hian Vanlalthazuala chuan point 27 zet mai a thun a, a thawhhlawk hle a ni.

Quarter hmasa berah 20-15 in VR4 in hma an hruai a, quarter hnihnaah Hollow lamin 21-18 a lehthalin halftime an hmang a, an dinhmun chu Hollow 36 - 38 VR4 a ni.

Hollow-in 3rd quarter an khel tha hle mai a, point 25 an thun belh laiin VR4 chuan point 14 an thun a, 4th quarter-ah VR4-in point 27 zet thun mahse an lehthal zo ta chuang lova, Hollow-in hnehna an chang ta a ni.

Thawhtanni (Jan 25) MBBA League Result

Division II

Zotlang 49-79 Tuikual South Youth

Chaltlang 57 - 73 Mischieves

Panthers 44 - 43 Zappers

Divison I

Hollow BBSP 84 - 83 Chawnpui VR4

Thawhlehni Fixture

Division II

09:30 AMBallers M. vs Cannon Boys

11:00 AMZeros vs Kulikawn

12:30 PM Sultans vs Ramthar

Division I

02:00 PMD.V.S.C vs Morning Crew