​Chawnpui FC leh Electric Veng FC inhnehtawk

21st September 2018, 01:09AM

Mc Dowell's No 1 Soda Mizoram Premier League (MPL) Season 7 Round 3 khelh tan a ni a, September ni 20, Ningani tlai khan kai thar Chawnpui FC leh Electric Veng FC inkhelah goal lut a lut lo a, chak zawk awm loin an inhnehtawk. He inkhelah hian Chawnpui FC defender Lalthlamuana chu Man of the match-ah thlan a ni.

Chawnpui FC hian Chhinga Veng FC an hneh loh hnuah Ramhlun North FC an draw-a, Electric Veng FC draw lehin; khelh thum atangin point 2 an hlawhchhuak. Electric Veng FC hian I League club Aizawl FC an hneh hnuah Mizoram Police FC hneh lehin, Chawnpui FC lakah erawh goal an khung lova, khelh thum atangin point 7 an nei ta a ni.

Chawnpui FC 0-0 Electric Veng FC

MoM: Lalthlamuana, Chawnpui FC

First half-ah goal hlauhawm hmuh tur a awm lem lo, team hnihte zingah chunungnung zawk an awm lo kan ti thei awm e. Electric Veng FC chuan goal thunna hun tha David Lalchhuanawma hmangin an nei a, Chawnpui FC pawhin goal thun ngei tumin nawr ve bawk mahse Vanrammawia Ngente chuan chance tha tak awmze awm lovah a chhuah bawk.

Second half-ah Electric Veng FC chuan inkhel thunun zawkin goal thunna hun tha pawh an ngah zawk a, Vanlalremruata, Vanlalremsanga leh David Lalchhuanawma te chuan an hun tha neih an hmang tangkai thei lo.

Chawnpui FC pawhin point 3 hlawhchhuah ngei an tum tih an game-ah a lang chiang, mual dinglam sirah Vanlalthanga che a hmuhnawm thin hle, hetih lai hian goal erawh a thawkchhuak thei bik lo.Huntawp dawn tak takah Vanrammawia Ngente chakna goal khung theihna chance tha tak a nei, mahse goalkeeper a paltlang zo lo. Goal lut awmloin khelmual an chhuah san a, point 1 ve ve an hlawh chhuak ta a ni.

Copyright © inkhel.com 2024. All rights reserved.