Mizoram Premier League (MPL) Season 8 khelh mekah November ni 9, Inrinni tlai round 11 match thumna Electric Veng FC leh Chawnpui FC inkhelah Chawnpui FC chuan 2-1 in Electric Veng FC hneh mahse, an dinhmun ngaiah dingin table mawngberah an la awm. He inkhelah hian Chawnpui FC forward Vanlalthlamuana chu Man of the match-ah thlan a ni.

Team pahnihte hi round 3-ah in tawngtawhin Electric Veng FC hian 3-1 inhneh mahse an intawn vawihnihnaah Chawnpui FC an chungnung zawk. Electric Veng FC hian point 15 neiin asang pali zingah tel phak a, Semifinal khelh beiseina an la nei mek. Chawnpui FC hian point 7 annei tawh a, match thum khelh hmabak awmin relegate thei dinhmunah an ding mek. 

Goal lut te hi first half leh second half alut an ni a, Chawnpui FC tan Vanlalthlamuana chuan goal hnih khungin Electric Veng FC tan David Lalchhuanawma chuan goal khat a khung ve bawk.

04:00 PM Electric Veng FC 1-2 Chawnpui FC

(David Lalchhuanawma 90+4' (P) (Vanlalthlamuana 15', 84')

MoM: Vanlalthlamuana, Chawnpui FC

First half-ah goal hlauhawm hmuh tur a tam lo a, team pahnih te an innawr tawn zak zak hnuah Electric Veng chuan goal thunna hun tha neiin box chhung chiah atanga forward Lalrammawia pet tha zet chu a goal dawn nia alan laiin Chawnpui keeper Nunmawia'n adan sak.

Chawnpui chuan nawr let ve bawkin minute 9-ah penalty an hlawhchhuak hlauh. He penalty hi midfielder C Lalremruata chuan petin Electric Veng keeper MS Dawngliana chuan adan sak. Chawnpui chuan nawr chhunzawmin minute 15-ah anhun tha neih hmang tangkaiin forward Lalnunmawia (Mawitea) ball pek tha zet chu Thlamuana chuan goal-ah chantirin an hmahruaina a khung.

First half huntawp dawnah Electric Veng forward David Lalchhuanawma leh Lalrammawia chuan an hun tha neih an hmang tangkai thei lo a, Chawnpui chuan 1-0 a hmahruaiin chawlhlawk an hmang zui ta a ni.

Second half-ah team pahnih te an innawr tawn leh zak zak a, goal luh belh tawh lo in Chawnpui chuan hnehna an chang mai dawn emaw tih hnu huntawp dawn minute 6 ala awmin Lalsangpuia ball pek tha zet chu Thlamuana bawk chuan goal-ah chantirin an goal hnihna akhung. Electric Veng pawhin added time-ah Penalty anhlawh chhuak hlauh. He penalty hi David Lalchhuanawma chuan goal-ah chantirin an siphurh sut then mahse huntawpin anang zui a, Chawnpui chuan 2-1 in hnehna an chang ta a ni.

November ni 14, Ninganiah round 12-na khelh tan a ni ang a, zan dar 7:00-ah Electric Veng FC hian Ramhlun North FC an hmachhawn ang a, November ni 15, Zirtawpni tlai dar 4:00-ah Chawnpui FC hian Chanmari FC hian an hmachhawn ang.

(adsbygoogle = window.adsbygoogle || []).push({});