31 Oct 2018 10:30

inkhel

​Chawnpui FC-in Chanmari FC an hneh

October ni 31, Thawhlehni zan Mc Dowell's No 1 Soda Mizoram Premier League (MPL) Season 7 Round 10 match hnuhnung ber vawihnih Champion tawh Chanmari FC leh kai thar Chawnpui FC te inkhelah Chawnpui FC chuan 2-1 a Chanmari FC hnehin point thum an hlawh chhuak. He inkhelah hian Chawnpui FC winger K. Roluahpuia chu Man of the match-ah thlan a ni.

Team pahnih te hi round 5-ah intawng tawhin Chawnpui FC hian 3-1 in anhneh a, an intawn vawihnihnaah pawh Chawnpui FC bawk chungnung zawkah an tang. Chanmari FC hian coach thar Chawngthansanga enkawlna hnuaiah match thum khel tawhin point khat chiah an hlawh chhuak a, khelh tawhah point 11 neiin parukna an ni mek. Chawnpui FC hian point 14 neiin pangana an ni mek bawk.

07:00 PM Chanmari FC 1-2 Chawnpui FC

(MC Malsawmzuala 74') (Vanlalthanga 9', Jerry F. Zonunsanga 61')

MoM: K. Roluahpuia, Chawnpui FC

Goal lut te hi first half leh second half-a lut an ni a, first half-ah Chawnpui FC tan Vanlalthanga chuan goal hmahruai a khung a, second half-ah Jerry F. Zonunsanga chuan an goal hnihna a khung leh a, Chanmari FC tan MC Malsawmzuala chuan goal khat a khung ve bawk.

Inkhel tan a ni a, Chanmari FC chuan nawr nghalin goal thunna hun tha an nei nghal a, Vanlalbiaa Chhangte shot tha zet chu goal sirah a kal a, Jeremy Laldinpuia chuan goal kham a petper bawk. Chawnpui FC chuan an hun tha neih hmang tangkaiin minute 9-ah Vanlalthanga'n box chhung atangin chiang zetin an hmahruaina a khung. 

Chanmari FC pawhin an siphurh sutna hun tha neiin MC Malsawmzuala shot tha zet chu Chawnpui FC keeper Thomas Lalthlamuana chuan a dan sak a, bench a tang a lut Lalnunzama shot tha zet chu a goal dawn nia alan laiin goal ban a per.

First half huntawp dawnah Chawnpui FC pawhin goal thun belhna hun neiin Jerry F. Zonunsanga leh Vanrammawia Ngente shot tha zet chu Chanmari FC keeper MS Dawngliana chuan a dan sak a, goal luh belh lo in Chawnpui FC chuan 1-0 a hmahruaiin chawlhlawk an hmang.

Second half tan a ni a, Chanmari FC chuan an siphurh sut ngei tumin nawr mahse goal an thun thei lo. Chawnpui FC chuan an hun tha neih hmang tangkaiin minute 61-ah veilam sir a tang a Vanlalnghenga ball vawrh luh tha zet chu Vanrammawia Ngente thawhrah sengin Jerry F. Zonunsanga chuan mawi takin an goal hnihna a khung. 

Chanmari FC chuan an siphurh sut ngei tumin counter attack-in an nawr a, minute 74-ah R. Lalawmpuia free kick tha zet chu box chhunga awm MC Malsawmzuala chuan tauh lutin an goal khatna a khung.

Huntawp dawnah Chawnpui FC pawhin goal thun belhna hun tha neiin Vanrammawia Ngente leh Vanlalthanga chuan Chanmari FC keeper MS Dawngliana chiah an hmachhawn hnuah MS Dawngliana chuan a dan sak. Chanmari FC pawhin an siphurh sutna hun tha neiin Lalnunzama leh Muanzova chuan an hun tha an hmang tangkai thei lo. Hun a tawp zui a, Chawnpui FC chuan 2-1in hnehna an chang ta a ni.

(adsbygoogle = window.adsbygoogle || []).push({});