30 Jan 2020 04:06

inkhel

Chawlh mai ka la tum lo: Valentino Rossi

Valentino Rossi chuan MotoGP khawvel atanga chawlh mai chu a la tum loh thu sawiin, 2020 hnuah pawh la tel zui zel a tum thu a sawi.

MotoGP legend Valentino Rossi hi Monster Energy Yamaha chuan Fabio Quartararo in an thlak a, Quartararo hi Maverick Vinales nen an inkawp dawn a. Hetiang a nih takah chuan Italian rider Rossi awm zel dan tur hi a chiang rih lo hle a, engmah sawi chian erawh an la nei lo thung.

Vawi 9 ngawt world champion lo ni tawh Valentino Rossi chuan, “Kum tirah khan Yamaha chuan ka awm zel dan tura thutlukna siam turin min ti tawh a. Season hmasa tawp dawna ka sawi tawh ang khan hmahmawh taka thutlukna siam ka duh lo a, hun ka la duh belh rih a ni,” a ti.

“Thutlukna ka siam mai loh avangin Yamaha chuan thu an pawt chat a. Tuna ka duh ber chu kuminah pawh la inel chhunzawm zel theih hi a ni a, 2021 ah pawh MotoGP rider la nih chhunzawm zel ka duh a. Chutih rual chuan season tan leh hunah intlansiak hmasa ho leh track hian thil thui tak an sawi a ngai dawn a ni,” a ti bawk.

A sawi zelnaah, “Intlansiak chhunzawm zel ka tum a nih chuan Yamaha hian min thlawp zel an tum a. Factory-spec bike leh factory contract min ruahmansak dawn a, test kan neih hunah pawh team tana chanchin tha tak nei thei turin theihtawp ka chhuah ang a, season bul tan turin ka inpeih ang,” a ti.

A hma deuhin Monster Energy Yamaha MotoGP chuan 2019 FIM MotoGP World Championship season chhunga Rookie of the Year atana an thlan, French rider Fabio Quartararo chu Maverick Vinales nen an inkawp dawn tih hi an lo puang lawk tawh a ni.

Kum 40-a upa Valentino Rossi hian 2020 season tawpah chuan intlansiak khawvelah kum 15 hun a hmang ve tawh dawn a ni.