Chawlh ka la tum reng reng lo: Sebastian Vettel

07th June 2019, 10:06PM

Sebastian Vettel chuan 2019 season tawpah Formula One chawlhsan a tum nia an sawi chu thu belh chian dawl lo a nih thu a sawi.

Kuminah Ferrari driver Sebastian Vettel chuan bul a tan tha lem lo hle a, tun season chhunga intlansiak awm tawhah Mercedes chuan Ferrari an la khum ziah bawk a. Vawi li ngawt world champion lo ni tawh hian Italian team-ah a zawnin kum nga chhung chu title a la lo leh mai dawn niin a lang.

Monaco Grand Prix an tlan zawh hnu khan Vettel hian Formula One khawvel chu chawlhsan a tum niin thawm a awm zui a, hei hi Vettel chuan a pha nghal vat a ni.

Vettel chuan, “Chawlh ka tum thu hi ka la sawi chhuak reng reng lo a, tuna thu thang kual vak pawh hi khawi atanga rawn intan nge a nih tih pawh ka hre lo. Chawlh chu ka duh hun hunah a ni thei ang a, team hian an duh hun hunah min pet chhuak thei bawk a. Tunah rih chuan he team-ah hian ka lung a la awi em em a, team pawh ka lakah an lung a la awi viau niin ka hria,” a ti.

“Dinhmun sang tak thlen duhna thinlung ka pu reng a, chak ngei tumin hma ka la bawk thin a. Tunah chuan hei aia pawimawh hi ka nunah a awm rih lo a, Ferrari hi chakpui ka duh em em mai a, chutiang chu thlentir ngei tumin tan ka la chho zel a ni,” a ti bawk.

A sawi zelnaah, “Tunah tak chuan a chak ber kan ni thei meuh rih lo a, tun aia tan kan lak zual deuh deuh a pawimawh hle dawn a. Hmabak kan la neihah theihtawp kan chhuah ang a, kan chak chhoh theih ngei pawh ka ring tlat a ni,” a ti.

Sebastian Vettel chuan, “Chawlh mai tum hnai anga ka chanchin darh mek hian min tibuai hauh lo a, eng vakah ka ngai hran lo a. An duh duh lo sawiin, an duh duh lo ti se, kei pawhin ka duh duh ka ti ve zel dawn,” tiin a sawi.

Kuminah vawi 6 an intlansiak tawh a, hengah hian Vettel chuan hmahruaitu Lewis Hamilton chu point 55 zetin a pha tawh lo a, podium-ah vawi thum chiah a la lawn ve thei a ni.

Copyright © inkhel.com 2024. All rights reserved.