Tyson Fury chuan boxing a chawlhsan hmain vawi hnih inhnek tur a la neih thu sawiin, Deontay Wilder leh Anthony Joshua te chu hnek leh phawt a tum thu a sawi.

Kum 31-a upa Tyson Fury hian ni kar khat chuang kal taah khan Deontay Wilder chu a hneh a, WBC heavyweight champion a nih theih phah a. Fury hi Anthony Joshua nen an sawi zawm mek a, chumi hmain kumin chhung ngeiin Wilder nen an inhnek nawn leh hmel hle a ni.

Bronze Bomber chuan Fury nen rematch nei thei tura thuthlung an lo ziah tawh chu hman tangkai a tum thu sawiin, nipui hunah chuan a vawi thumna atan Tyson Fury nen hian an inhnek leh ngei a rinawm.

Deontay Wilder nen vawi thum an inhnek zawhah hian Gypsy King chuan unification fight nei turin Anthony Joshua chu a hmachhawn theih tawh hmel hle a, hemi hnuah hi chuan boxing khawvel chu chawlhsan a tum tawh a ni.

Fury chuan, “Tunah chuan vawi hnih inhnek tur ka la nei a, chumi zawh hnuah chuan khawi lam hawiin nge ke ka pen dawn tih chu ka ngaihtuah leh dawn a. Boxing khawvel hi chu ka chawlhsan tawh dawn a ni,” a ti.

“Eng chen nge ka la kal zel dawn? Kumin hi professional boxing ka luhchilh atanga kum 12-na chiah a ni ve tawh dawn a, hemi hun chhung hian professional fight vawi 31-ah hneh loh ka la nei miah lo a ni,” a ti bawk.

A sawi zelnaah, “Undisputed world heavyweight champion ka ni tawh a, Klitschko ka hneh khan belt zawng zawng ka kawl vek tawh a. Anthony Joshua hi chuan ka kalsan hnu kha a lo chhar khawm leh vel mai mai a ni,” a ti.

“Ka belt kawl ho kha ka hloh a ni lo a, ka rilru lampanga harsatna ka neih ching fel turin ka title ka kalsan rih a ni mai a, hei vang hian ka belt vek an la ni ber a. Boxing ring chhungah min hneh a nih ngawt loh chuan eng vangin nge AJ hi champion a lo intih ve ngawt?” tiin Fury chuan a sawi.