17 Nov 2020 04:39

inkhel

Chawl tawh tura rin kai zual

2020-21 season chu a kal chho mek a, ram hrang hrangah league neih a nih bakah Europe khawmualpuia inelna pawh neih mek a ni bawk a. Football player thenkhat chu tun season bak an inkhelh tawh hmel loh hle a, chutianga chawl hnaivai thenkhat chu han thlir kual ila.

Wayne Rooney
England legend hi tun season bak chu khelmualah a inlan tawh loh hmel hle a. Everton ah tum hnih a khel hman a, Manchester United leh Los Angeles Galaxy ah te a khel tawh bawk a, tunah chuan Wayne Rooney hi Derby player-coach a ni mek a ni.

Premier League title vawi 5 la tawh, kum 35 mi Rooney hi Rams coach Philip Cocu aiawhtu a nih a rinawm hle a. Championship game 8 khelhah goal 1 chauh a thun thei a, khelmual atangin a sir lamah awmhmun a khuar zui a rinawm tawh hle a ni.

Gianluigi Buffon
Kum 42 a ni ve tawh a, Gianluigi Buffon chuan a kutkawr a dahtha ve ngei tawhin a rinawm hle a. Kum 17 chhung zet Juventus-ah hun a hmang a, trophy pawh a la hnem hman hle a, season khat chu Paris Saint-Germain lamah a hmang ve bawk a ni.

Italian legend hi Juventus lamah a kir leh a, Old Lady tan season hnihna a hmang leh mek a. Wojciech Szczesny tha chhang dawltu a ni tawh a, tun season tawpah chuan contract a hmang zo ang a, inkhelh hi a chawlhsan zui a rinawm.

Zlatan Ibrahimovic
A kum a tam tial tial a, a that belh zel emaw tih mai tur a ni a. Swedish striker hi kum 39 mi a ni tawh a, AC Milan tan a la khel tha thei hle a, tun season chhungin Zlatan hian Serie A game 5 khelhah goal 8 zet chu a thun tawh a ni.

AC Milan chu Serie A hmahruaitu a nihpui mek a, league title a lakpui a nih ngat chuan title 14 a lakna a ni tawh dawn a. A hmain Ajax, Inter Milan, Barcelona leh Juventus te chu league title hi a lo lakpui tawh hlawm a, AC Milan pawh 2010-11 ah khan a lakpui tawh bawk a ni.

Andres Iniesta
Spain legend hian La Liga title vawi 9 ngawt a lakna Barcelona a chhuahsan a, Japanese club Vissel Kobe chu 2018 ah khan a zawm a. Japan ram a pan hnuah hian match 58 chu a khel tawh a, hengah hian goal 13 chu a thun ve tawh a ni.

2019 ah khan kum 36 mi Iniesta chuan kum 37 emaw, kum 38 a nih thlenga inkhelh a tum thu a sawi chhuak a. May 2021 ah chuan Iniesta hi kum 37 a ni ve tawh dawn a, inkhelh bansanin coaching lam a luhchilh a rinawm hle.

Franck Ribery
A vanglai chuan khawvela winger hlauhawm ber pawl a ni thin a, 2019 ah khan Ribery chuan Bayern Munich chhuahsanin Fiorentina a zawm a ni.

Bundesliga club lian Bayern Munich a chhuahsan lai khan kum 37 mi French winger Ribery chuan kum hnih vel hun a la neih thu a sawi a. A sawi ang a nih chuan 2021 nipui thleng vel chu a la inkhel dawn tihna a ni ang.

Giorgio Chiellini
Italian legend hian kum thar nipui hunah Juventus tana a contract neih chu a hmang zo tawh dawn a, kum 16 zet chu he club-ah hian hun a hmang ve dawn a ni.

Kum tharah chuan Chiellini hi kum 37 a ni ve tawh dawn a, tun season chhungin Serie A game 3 chiah a la khel a, hei vang hian a chawlh tawh mai a rinawm tawh a. Italy aiawhin vawi hnih chu a feh chhuak ve tawh thung a ni.

Lukasz Piszczek
Polish right-back hi 2010 atang khan Borussia Dortmund ah a la awm char char a, hun duhawm tak tak a hmanpui nual bawk a ni.

Piszczek hian Borussia Dortmund chu Bundesliga title vawi hnih a lakpui bakah 2013 UEFA Champions League final a thlenpui bawk a. 2020 nipui lai khan football khelh chawlhsan a tum thu a sawi zet a, kum khat chhung atan a contract a pawt sei leh ta zawk a ni.