Chawl hman ka ni lo: Jeremy Lalrinnunga

10th October 2018, 10:10PM

Jeremy Lalrinnunga chuan India chu a tha zawngin khawvel hriatah bung thar a kaipui zo chiah a, Youth Olympics-a gold medal a lak chu lawmna hun pawh a nei vak lo niin a sawi a. Jeremy hian kum hnih pawh tling tawh loa Olympic thleng tur atan inbuatsaih nghal a ngaih thu a sawi.

Mizo rawlthar Jeremy chuan Argentina khawpui Buenos Aires-ah gold medal hi a la a, khawvela a chungnung ber a nihna hi nuamsa taka awm a lawm hman a nih loh thu sawiin, a aia lian zawk a thlir leh nghal niin a sawi a. 2020 Tokyo Olympics atana inpuahchah chhoh nghal a duh thu a sawi a ni.

Lalrinnunga chuan, “Gold medal ka dawng thei ka ka lawm tak zet a, October 21 hian Patiala-ah ka kir leh dawn a, 2020 Tokyo Olympics atan ngawrh takin inbuatsaih zui nghal ka duh a. Tun tumah khan 62 kg category-ah ka tel a, mahse Olympics-ah chuan 67 kg category-a tel ka tum dawn a, hei vang hian theihtawp chhuah a ngai dawn a ni,” a ti.

National level boxer Lalneihtluanga fapa Lalrinnunga hian a hma chuan a pa hnung a zui titih hman a, a pa rualin boxing a training ve thin a. Mahse a hnu lamah rit chawi lamah hian a inlet ta daih a, a tifuh ta phian a, khawvel huapah a hming a lang der tawh a ni.

Rit chawi a tih tan tirh hian 50 kg category atangin bul a tan a, tlem tlemin a lawn chho hret hret a, kum hnih chhungin 62 kg category-ah a chho hman der a ni.

Kum 8 mi chauh a nih laiin Mizoram Weightlifting Academy-ah a lut tan a, a hnuah Pune lam panin Army Sports Institute-ah a awm zui a, 2012 atangin helai hmunah hian a awm chho a ni.

“Ka thang chho ve zel a, ka san belh rualin ka rihna pawh a pung ve zel bawk a. Heti a nih takah chuan ka coach in 50 kg atangin 56 kg a insawn turin thurawn min pe a. 56 kg a ka tih hnuah pawh ka rihna chu a rawn inthlak danglam zel tho a, hei vang hian 62 kg lam tinzawn chu kan rilruk leh phah ta a ni,” tiin Jeremy chuan a sawi.

Tun tumah 62 kg category-ah gold medal a la a, 2020 Tokyo Olympics-ah chuan 67 kg category-a tel a tum avangin ngawrh taka a inbuatsaih ngei chu a ngai dawn a, hei vang hian awm mai mai hman a nih loh zia chu a chiang hle a, lawmman dawng thei tur phei chuan theihtawp a chhuah ngei a ngai dawn a ni.

Copyright © inkhel.com 2024. All rights reserved.