08 Feb 2018 10:52

inkhel

Chawhruala NBA team-te hlut zawng $1.65bn

Forbes magazine chuan NBA team 30-te hlut zawng tichhuakin NBA chanchina team tinte hlut zawng san ber țum a tling a, chawhrualin team tinte hlut zawng hi a tlem berah $1bn (£719m) a tling.

Ram țhang zel leh US television deal-a hamțhatna a pun avangin NBA team-te hlutna hi a pung tih Forbes chuan an tarlang a, kum liamta nena chhutin kumina a punna hi 22% a ni bawk.

NBA team 30 zingah hian New York Knicks an hlu ber niin Forbes hian an tarlang a, Knicks hlutna hi $3.6bn niin an chhut.

Knicks hian Madison Square Garden-a mual an sawn hnuin sum an hailut hnem a, khawvela sports team hlu an tarchhuahah parukna hauh phain an hmaah Real Madrid (football), Barcelona (football), Manchester United (football), New York Yankees (baseball) leh Dallas Cowboys (NFL)-te an awm.

Los Angeles Lakers ($3.3bn) pawhin dinhmun sang an la hauh pha a, Golden State Warriors ($3.1bn) leh Chicago Bulls ($2.6bn)-te pawh an la hlu ve hle.

Kum 2016-a champion Cleveland Cavaliers erawh NBA team hlutna an tehfungah hian 15-na an ni thung a, an team hlut zawng hi $1.3bn niin nikum lam khan sum an hloh.

Forbes tarchhuah zingah hian NBA-a team hlu lo ber chu New Orleans Pelicans an ni a, hlu lo ber mahse Pelicans hlut zawng hi $1bn tling pha tho a ni.