Cleveland Cavaliers veteran Channing Frye chuan NBA regular season kal mek zawh rualin chawlh a tum tawh thu a sawi.

Channing Frye hian Cleveland Cavaliers in New York Knicks an hneh hnu khan Instagram-ah Madison Square Garden-a a inkhelh hnuhnung ber a nih tur thu a tarlang a, hetah hian chawlh a tum a ni tih chu miin an hre chiah a ni.

Cavaliers forward Frye hian 2016 khan NBA title a la a, Cleveland Cavaliers chu kum thum kalta khan a champion pui a. Zirtawpni khan Twitter lamah chawlh a tum thu hi chiang zawkin a puangzar a ni.

Frye chuan, “Chawlh ka tum tak tak a. Zinkawng nuam leh chhinchhiahtlak tak mai ka zawh thei kha lawmawm ka ti a. Player tha tak tak leh thiam tak tak mai ka khelhpui teuh hman a, coach ropui tak tak hnuaiah ka khel nual bawk a. Ka inkhelh hun lai hi ka la ngai thei viau dawn a, mahse pal lehlama khawvel awm dan pawh ka hmu chak tawh viau a ni,” a ti.

Kum 35-a upa Frye hian Los Angeles Lakers, Phoenix Suns, Orlando Magic, Portland Trail Blazers leh Knicks ah te a lo khel kual tawh a. Kuminah Cleveland tan game 29 khelin, game tina a average chu 3.3 points, 1.5 rebounds a ni a, tun season kal mek hi NBA season 13 a telna chiah a ni.

Cleveland Cavaliers chu 15-47 niin Eastern Conference standing-ah 14-na an ni mek a, Detroit Pistons chu an hmachhawn leh hmasak ber tur an ni.