Mahuma Memorial Cricket Tournament chu Round 2 khelh zawh a nih hnuah November ni 23, 2016 khan Round 3 khelh tan a ni a, Round 3 ni khatnaah President's Cup Champion Chanmarians chuan kai thar Tlangnuam Cricket Club chu awlsam takin an hneh a ni.

Toss-a chak zawk Tlangnuam lamin Zarkawt Lords an hneh tuma an game plan ang bawk an hmang leh a, ball zawi tak takin stumps-ah an rawn dah leh chat chat, Chanmarians Top Order te thinin a tuar lo ni ngei tur a ni, Wicket 5 rang takin an hloh nghal mai a.

Amaherawhchu batting lineup nei thui tak Chanmarians an buai rei lo, Zothansanga leh Lalthazualate rawn ding nghetin Zothansanga phei chuan Half Century a rawn vaw chhuak hial a.

A tawp lam Reuben Lalhruaizela leh F. Lalmuanzuala ten an rawn khar that avangin Chanmarians te hian over 40 hmang zovin wicket 9 an hloh a, run 205 lai an vaw chhuak a, Tlangnuam vawmtu lamah Lalnuntluanga chuan over 8 vawmin wicket 5 a la a, run 44 a pe bawk a ni.

An bowling hmachhuan zawk Tlangnuam tan target huphurhawm tak ni mahse a tir lamah run rate an rawn nei tha nghal viau a, mahse rei a ni lo, wicket an hloh chho ta reng a, opener Lalnunpuia leh Denver Khuhly ten double figure kai ve hram mahse Chanmarians Bowler te an ngamlo chhunzawm zel.

Lalhruaizela leh F. Lalmuanzuala ten an vawm tha chhunzawm zel bawk si, over 17.4 ah run 60 chiah siamin Tlangnuam lam an out ta vek a, Chanmarians hian Tlangnuam te hi run 145 in an sawp ta a ni.

24.11.2016 (9:15 AM)

Chaltlang SC vs Zarkawt Lords