McDowells No 1 Soda Mizoram Premier League Round 7 chu khelh zawh a ni ta a, match hnuhnung berah Chanmari West FC chuan 3-2 in Luangmual FC an hneh.
Chanmari West FC hi si hnih faiin an chak lo ren rawn a, an si phurh te rul zovin Lalnunsanga Hnamte chuan chakna goal second half-ah a khung ta a ni.
Luangmual FC 2-3 Chanmari West FC
(Lalliansanga 13', 18') (Lallawmsanga 27', C. Ramdinmawia 40', Lalnunsanga Hnamte 68')
Luangmual FC XI : Isak Lalmuanpuia, K Lalthlahlova, Lalthawmmawia, Hmingthanzauva, C Lalnunpuia, MS Dawgliana, Lalchhanchhuaha, Lalthazuala, PC Laldinpuia, Lalliansanga, Laldinliana Varte
Chanmari West FC XI : Lalruatpuia, C Ramdinmawia, Lalnunpuia, Benjamin, Vanneihtluanga, H Lalthangliana, Lalbiakhlua, Lallawmsanga, Zion Lalramluaha, Lalnunsanga Hnamte, H Lallianzama
Minute 18 chhungin Lalliansanga chuan Luangmual FC si hnih faiin hma a hruaipui tlat mai. A goal hmasa zawk phei chu mawi tak a ni a, Liansanga hian Ramdina mawi takin box chhungah a bum a, chumi hnuah a pet goal chhunzawm. 18th mins-ah Dinliana pek tha zet chu Liansanga bawk hian a khung leh a, Chanmari West FC goalkeeper Mama chuan a dang thei thlawt lo a ni.
Chanmari West FC hian half time hmain heng an goal hnihte hi an rul hman a, 27th mins-ah Chanmari West FC hian free kick an hlawh chhuak a, he free kick atanga ball kal zel chu box chhungah Lawmsanga chuan changin, lei hrul goal kilah chuan a chhuih lut ta a, first half tawp dawn minute 5 la awmin Ramdina chuan Chanmari West FC si phurh a rul ta nge nge.
He goal pawh hi set piece atanga lut a ni a, Tluanga free kick tha zet chu Luangmual FC goalkeeper Isaka chuan a lo beng a, goal bar a per, hemi ball per hi Ramdina chuan a pet goal chhunzawm ta a, half time a nih chuan 2-2 in an inhnehtawk a.
Second half-ah Chanmari West FC lamin bul an tan tha zawk a, Zama hmel kan hmu deuh chhen, Hlutea pawhin free kick atangin goal a khung teuh hle bawk. Goal hi 68th mins-a lut a ni a, Ramdina ball vawrh tha lutuk chu Lalnunsanga Hnamte chuan tha takin a tauh goal a, he goal hi Chanmari West FC chuan an chak pui ta a ni.
Khelh 7 atangin Chanmari West FC chuan point 10 an hlawh chhuak a, table-ah 4 na an ni mek, Dinthar FC chu point khat chiahin an phak lo a ni. Luangmual FC chu point 8-ah an la thu a, table-ah 6 na an ni ta a ni.
pictures credit : PC Lala