08 Nov 2018 10:33

inkhel

​Chanmari FC leh Ramhlun North FC chak zawk an awm lo

November ni 8, Ningani tlai Mc Dowell's No 1 Soda Mizoram Premier League (MPL) Season 7 Round 12 match vawi khatna Chanmari FC leh Ramhlun North FC inkhelah chak zawk awmlo in 2-2 in an inhneh tawk a, point khat ve ve an hlawh chhuak. He inkhelah hian Chanmari FC forward Lalnunzama chu Man of the match-ah thlan a ni.

Team pahnih te hi round 1-ah in hmachhawn tawhin Chanmari FC hian 2-0 in anhneh a, an intawn vawi hnihnaah chungnung zawk an awm lo. Chanmari FC hian khelh tawhah point 15 neiin panga an hauh lailawk a, semifinal khel turin match khelh hmabak an neihah chak nge ngei an ngai tawh. Ramhlun North FC hian point 10 neiin pa sarihna an ni mek a relegate an duh loh chuan khelh hmabak an neihah chak an ngai.

02:30 PM Chanmari FC 2-2 Ramhlun North FC

(Laldampuia 57', Lalnunzama 71') (Lalnunmawia 24', Jessy Vanlalmuana 43')

MoM: Lalnunzama, Chanmari FC

Goal lut te hi first half leh second half-a lut an ni a, first half-ah Ramhlun North FC tan Lalnunmawia leh Jessy Vanlalmuana chuan goal an khung chu second half-ah Chanmari FC tan Laldampuia leh Lalnunzama chuan an siphurh an rul.

First half-ah Ramhlun North FC chuan inkhel thunnun zawkin goal thunna hun tha an nei nghal a, Lalliansanga (Notea) chuan Chanmari FC keeper MS Dawngliana chiah a hma chhawn hnuah MS Dawngliana chuan a dan sak a, Lalmawizuala ball vawrh luh chu box chhunga awm Vanlallawma chuan goal kham a tauh per bawk.

Minute 24-ah Ramhlun North FC chuan an hun tha neih hmang tangkaiin Laldingngheta corner pet tha zet chu box chhunga awm Lalnunmawia chuan mawitak a tauh lutin an hmahruaina a khung.

Chanmari FC pawhin hun tha neiin Vanlalbiaa Chhangte chuan Ramhlun North FC keeper Eddie Zorammawia chiah a hmachhawn hnuah Eddie Zorammawia chuan a dan sak a, Box chhung chiah a tang a Laldampuia shot tha zet chu a goal dawn nia alan laiin goal ban a fuh bawk.

Ramhlun North FC chuan huntawp dawn minute 2 ala awmin an hun tha neih an hmang tangkai leh a, Laldingngheta corner pet tha zet chu box chhunga awm Jessy Vanlalmuana chuan chiang zet a pet lutin an goal hnihna a khung a, Ramhlun North FC chuan 2-0 a hmahruaiin chawlhlawk an hmang zui ta a ni.

Second half-ah Chanmari FC insiam thain inkhel an thunun zawk a, minute 57-ah an hun tha neih hmang tangkaiin mual dinglam sir a tang a, bech a tang a lut Lalnunzama ball pek tha zet chu box chhunga awm Laldampuia chuan chiang zeta pet lutin an goal khatna a khung.

Chanmari FC chuan nawr chhunzawmin MC Malsawmzuala'n an siphurh sutna hun tha a hman tangkai thei loh hnu minute 71-ah mual dinglam sir a tang a, Vanlalbiaa Chhangte ball bawrh luh tha zet chu box chhunga awm Lalnunzama chuan mawi tak a tauh lutin an siphurh a sut ta a ni.

Huntawp dawnah Chanmari FC chuan goal thun belhna hun tha neiin box pawn chiah a tang a, Lalnunzama goal shot chu a goal dawn nia alan laiin Ramhlun North FC keeper Eddie Zorammawia chuan a dang hman a, goal luh belh tawh lo in 2-2 a inhneh tawkin khelmual an chhuah san ta a ni.

(adsbygoogle = window.adsbygoogle || []).push({});