05 Nov 2019 10:34

inkhel

Chanmari FC leh Electric Veng FC chak zawk an awm lo

Mizoram Premier League (MPL) Season 8 khelh mekah November ni 5, Thawhlehni tlai round 9 match hmasa ber Electric Veng FC leh Chanmari FC inkhelah chak zawk awmlo in 1-1 in an inhneh tawk a, table-ah an dinhmun ngai an luah zui bawk.

Team pahnihte hi round 7-ah in tawngtawhin Electric Veng FC hian 1-0 in anhneh tawh a, an intawn vawihnihnaah chak zawk awmlo in an inhneh tawk. Chanmari FC hian point 15 neitawhin palina an ni mek a, Electric Veng FC hian point 15 bawk neiin pangana an ni mek bawk. 

Goal lut te hi first half leh second half a lut an ni a, first half huntawp dawnah Chanmari FC chuan goal hmahruai an khung chu second half-ah Electric Veng FC chuan an sut. He inkhelah hian Chanmari FC midfielder David Laltlansanga chuan of the match-ah thlan a ni.

04:00 PM Electric Veng FC 1-1 Chanmari FC

(David Lalchhuanawma 68') (Lalremruata 41')

(MoM : David Laltlansanga, Chanmari FC

First half-ah Chamari FC chungnung zawkah tang mahse goal hlauhawm annei tam lo a, mual veilam sir atanga MS Dawngliana ball pek luh tha zet chu midfielder Remruata leh forward Lalremruata chuan an hun tha neih an hmang tangkai thei lo. Chanmari FC chuan nawr chhunzawmin minute 71-ah forward Remruata'n ball tha hmuh chu box-ah lalutin an hmahruaina a khung. First half huntawp dawnah midfielder David Laltlansanga'n goal thun belhna hun tha aneih chu a hmang tangkai thei lo a, Chanmari chuan 1-0 a hmahruaiin chawlhlawk an hmang ta a ni.

Second half-ah Chanmari bawk chungnung zawkah tangin goal thun belhna hun tha annei nual a, box chhung chiah atanga Remruata shot chu goal sirah a kal. Electric Veng chuan minute 68-ah an hun tha neih hmang tangkaiin bench atanga lut defender Rorelliana freekick tha zet chu box chhunga awm forward David Lalchhuanawma chuan tauh lutin an siphurh a rul.

Chanmari chuan inkhel thunun zuiin goal thun belhna hun tha annei zui leh a, bench atanga lut Nunzama'n box chhung chiah atanga a pet chu a goal dawn nia alan laiin Electric Veng keeper Msa'n a dan sak hnuah MS Dawngliana chuan goal kham atauh per zui bawk.

Huntawp dawnah Electric Veng Defender Dinpuia hnawhchhuah zui a ni a, Electric Veng-in kimlo in khel mahse, Chanmari chuan goal an thun thei tawh bik lo a, 1-1 a inhneh tawkin khelmual an chhuah san ta a ni. November ni 9, Inrinni tlai dar 4:00-ah Electric Veng FC hian Chawnpui FC an hmachhawn ang a, zan dar 7:00-ah Chanmari FC hian Chhinga Veng FC hian an hmachhawn ang.

(adsbygoogle = window.adsbygoogle || []).push({});