Mizoram Premier League (MPL) Season 8 khelh mekah round 12 chu AR Lammualah Pawl Kut an hman avangin Rajiv Gandhi Stadium Mualpuiah khelh a ni a, November ni 15, Zirtawpni match hnihna table mawngphah Chawnpui FC leh pangana Chanmari FC inkhelah goal lut awmlo in an inhneh tawk a, point 1 ve ve an hlawh chhuak. He inkhelah hian Chawnpui FC goalkeeper Vannunmawia chu Man of the match-ah thlan a ni.
Team pahnihte hi Kolasib khelmualah in tawngtawhin Chanmari FC hian 3-2 in an hneh a, an intawn vawihnihnaah erawh Chungnung zawk awmlo in an inhneh tawk. Chanmari FC hian point 16 neiin asang pali zingah an inhlangkai a, Semifinal luh beiseina annei thar bawk. Chawnpui FC hian point 8 neiin a hnuai berah an awm a, FC Venghnuai leh Mizoram Police FC anhmachhawn leh ang.
02:00 PM Chawnpui FC 0-0 Chanmari FC
MoM: Vannunmawia, Chawnpui FC
Inkhel tan a ni a, team pahnih te an innawr tawn zak zak hnuah Chawnpui chuan goal thunna hun nei hmasa zawkin forward Vanlalthlamuana leh midfielder Larry Lalrinawma chuan Chanmari keeper T Mawia tan hna hautak erawh an thlen lo. Chanmari pawhin goal thunna hun nei ve bawkin box chhung mual dinglam sir atanga midfielder Lalremruata shot tha zet chu Chawnpui keeper Nunmawia'n a dan sak.
Chanmari chuan minute 35-ah Penalty an hlawh chuak hlauh. He penalty hi forward MS Dawngliana chuan petin Chawnpui keeper Nunmawia'n a dan sak a, Chawnpui an him hram. First half huntawp dawnah Chawnpui chuan goal thunna hun neiin hnaitak atanga Larry Lalrinawma shot tha zet chu a goal dawn nia alan laiin Chanmari defender Lalrinchhana Tochhawng chhan adang hman a, goal lut awmlo in chawlhlawk an hmang zui ta a ni.
Second half-ah pawh goal lut a awm lo a, Chanmari chuan goal thunna hun tha nei hmasa zawkin box chhung chiah atanga midfielder Lalremruata chuan goal sirah apet a, Chawnpui pawhin goal thunna hun neiin forward Lalsangpuia, Larry Lalrinawma leh Vanlalthlamuana shot tha tak chu Chanmari keeper T Mawia'n adan sak.
Chanmari chuan nawr letin forward Lalremruata'n leh bench atanga lut Lalnunzama chuan Chawnpui keeper Nunmawia chiah ahmachhawn hnuah Nunmawia'n a dan sak. Huntawp dawnah Chanmari chuan goal thunna hun neiin box chhung chiah atanga MS Dawngliana shot chu Chawnpui keeper Nunmawia'n a dan sak a, goal lut awmlo khelmual an chhuah san ta a ni.
November ni 16, Inrinniah round 12 khelh zawh a ni ang a, tlai dar 4:00-ah Ramhlun North FC leh Electric Veng FC an inkhel ang a, zan dar 7:00-ah Aizawl FC leh FC Venghnuai an inkhel leh ang.
(adsbygoogle = window.adsbygoogle || []).push({});