​Chanmari FC leh Bethlehem Vengthlang FC an inhnehtawk

17th October 2015, 05:10AM

McDowells No 1 Soda Mizoram Premier League Round 7-ah Chanmari FC leh Bethlehem Vengthlang FC te chu 2-2 in an inhnehtawk a, Chanmari FC tan Lalrinchhana leh Malsawmfela ten goal an khung a, Bethlehem Vengthlang FC tan Lalrammawia leh Fela Zote ten goal an khung a ni.

Bethlehem Vengthlang FC hian Chanmari FC player tha tha an chhuhsak a, Chanmari FC chu 2-1 in an chak mai tawh dawn emaw tih laiin hun tawp dawn minute 6 lawmin Fela Zote chuan a club hlui lamah goal a khung a, 2-2 in an inhnehtawk phah ta a ni. He match-ah hian Bethlehem Vengthlang FC striker MS Dawngliana chu man of the match atan thlan a ni.

Chanmari FC 2-2 Bethlehem Vengthlang FC

(Lalrinchhana 11', Malsawmfela 42') (Lalrammawia 38', Fela Zote 84')

Chanmari FC XI : MSA, Achia, Rinchhana, Rozama, David, Chhinga, Reubena, Danmawia, Joseph, Thlamuana, Sawmfela.

Bethlehem Vengthlang FC XI : Muansanga, Zautea, Muanawma, Notea, Dinliana, Rinchhan, Puitea, Rinsanga, Rmmawia, Fela Zote, Dawngtea

Goal a lut hma hle a, Chanmari FC chuan minute 11 na lekah corner atangin goal an khung a. Chhinga corner pet tha zet chu Lalrinchhana chuan a tauh lut a, si khat faiin hma an hruai. He goal hi 38th mins-ah Lalrammawia chuan Bethlehem Vengthlang FC tan a rul a.

Mual dinglam sir atanga Rinsanga cross chu Rinchhana chuan a clear tha lo hle, hei hi Lalrammawia chuan box chhung atangin bottom corner-ah a chhuih goal, 1-1 in an inhnehtawk a. Mahse first half tawp dawn minute thum la awmin Malsawmfela chuan mual dinglam sir atanga Joseph-a cross tha zet chu mawi takin a pet goal a, half time a nih chuan 2-1 in Chanmari FC chuan hma an hruai.

Second half inkhel hmuhnawm tak kan en a, an innawr tawk a, Danmawia pawhin goal khungna chance tha tak a nei. Hun tawp dawn minute 6 la awmin Dawngtea chuan Joseph-a tha taka a bum hnuah Fela Zote a pe a, ani hian a ti goal chhunzawm ta a ni. Hun tawp dawn tak takah Malsawmfela chuan chakna goal khung theihna chance tha tak nei mahse a thelh a, 2-2 in an inhnehtawk ta a ni.

MPL Round 7 khelh zawh a ni a, chawlh neih lawk a ni anga, khelh 7 atangin Chanmari FC chuan 13 points an nei a, table-ah pahnihna an ni chhunzawm zel a, hmahruaitu Aizawl FC chu point 5-in an phak lo mek. Tin, nimin lamah Dinthar FC an chak bawk si a, Dinthar FC aiin Chanmari FC hi point hnihin an chungnung zawk a ni. Bethlehem Vengthlang FC chuan khelh 7 atangin point 9 an nei a, table-ah 5-na an ni mek a ni.

pictures credit : PC Lala

Copyright © inkhel.com 2024. All rights reserved.