Mizoram Premier League (MPL) Season 8 khelh mekah November ni 2, Inrinni zan round 9 match hnuhnung ber FC Venghnuai leh Chanmari FC inkhelah Chanmari FC chuan 2-0 in FC Venghnuai hnehin a sangpali zingah an inhlangkai leh a, Semifinal khelh beiseina an nei thar leh ta a ni.

Team pahnihte hi round 5-ah intawngtawhin Chanmari FC hian 2-1 in an hneh a, an intawn vawihnihnaah pawh Chanmari FC chungnung zawkah an tang leh ta a ni. Chanmari FC hian point 14 neitawhin asang pali zingah an inhlangkai a, FC Venghnuai hian point 10 neiin parukna an ni mek.

Goal lut te hi second half-a lut an ni a, Chanmari FC tan Lalbiaknia Royte leh Lalnunzama chuan goal khat ve ve an khung. Chanmari FC defender Lalbiaknia Royte chu Man of the match-ah thlan a ni bawk.

FC Venghnuai 0-2 Chanmari FC

(Lalbiaknia Royte 67', Lalnunzama 71')

MoM: Lalbiaknia Royte, Chanmari FC

First half-ah team pahnih te an intluk tawk hle a, goal hlauhawm hmuh tur atam lo. An innawr tawn zak zak hnuah Chanmari chuan goal thunna hun tha neiin midfielder David Laltlansanga'n box chhung chiah atanga apet chu FC Venghnuai keeper Lawmzuala'n a dan sak a, state pawn player Godwin Quashiga leh Lalremruata ten an hun tha neih an hmang tangkai thei lo ve ve bawk.

Second half-ah Chanmari FC insiam thain bench atanga lut Lalnunzama chuan danglamna arawn thlen. An goal bawh ana sawt a, an hun tha neih anhmang tangkai zui bawk. Minute 67-ah Mual dinglam sir atanga MS Dawngliana ball pek luh tha zet chu Man of the match atana thlan Lalbiaknia chuan chhuih lutin an hmahruaina a khung.

Chanmari chuan nawr chhunzawmin box pawn chiah atangin Lalnunzama'n goal kham apetper hnuah Lalnunzama chuan an chak nemnghehna goal a khung. He goal hi Lalbiaknia ball vawrh luh tha zet chu Lalnunzama chuan atauh lut a ni. FC Venghnuai chuan an siphurh sut ngei tumin nawr let mahse Chanmari defender te an dingkhawng ve tlat. Huntawp thlengin FC Venghnuai hian an siphurh hi an sut thei tawh lo a, Chanmari chuan 2-0 in hnehna an chang zui ta a ni.

November ni 5, Thawhlehni tlai dar 4:00-ah Chanmari FC hian Electric Veng FC an hmachhawn ang a, November ber ni 6, Nilaini tlai dar 4:00-ah FC Venghnuai hian Mizoram Police FC an hmachhawn ang.

(adsbygoogle = window.adsbygoogle || []).push({});