​Chanmari FC-in Bethlehem Vengthlang FC an hneh

21st September 2018, 03:09AM

Mc Dowell's No 1 Soda Mizoram Premier League (MPL) Season 7 round 3 September ni 20, Ningani zan Chanmari FC leh Bethlehem Vengthlang FC inkhelah Chanmari FC chuan 2-1 in hnehna an chang a, point 3 an hlawh chhuak. He inkhelah hian Chanmari FC chakna goal khungtu Mark Zothanpuia chu Man of the match-ah thlan a ni.

Chanmari FC tan Lalnunzama leh Mark Zothanpuia chuan goal khat ve ve an khung a, Bethlehem Vengthlang FC tan PC. Vanlalhruaia chuan goal khat a khung ve bawk. Goal lut te hi first half leh second half-a lut an ni a, First half-ah chanmari FC chuan Lalnunzama goal hmangin hmahruai mahse, second half-ah Bethlehem Vengthlang FC tan PC Vanlalhruaia chuan an siphurh a rul a, huntawp dawnah Chanmari FC tan Mark Zothanpuia chuan an chakna goal a khung.

Chanmari FC hian Ramhlun North FC an hneh hnuah Aizawl FC an draw-a, Bethlehem Vengthlang FC hnehin khelh tawh point 7 an nei a, Bethlehem Vengthlang FC hian Mizoram Police FC an henh loh hnuah Chhinga Veng FC an hneh lo leh a, Chanmari FC hneh lo leh in point an la nei lo a ni.

07:00 PM Chanmari FC 2-1 Bethlehem Vengthlang FC

(Lalnunzama 28', Mark Zothanpuia 88') (PC Vanlalhruaia 59')

MoM: Mark Zothanpuia, Chanmari FC

Inkhel tan a ni a, team pahnih te an innawr tawn zak zak hnuah Bethlehem Vengthlang FC chuan goal thunna hun tha nei hmasa zawkin Lalruatkima (Rka) goal shot tha zet chu Bethlehem Vengthlang FC keeper Lawmzuala chuan a dan sak. Chanmari FC chuan minute 28-ah an hun tha neih hmang tangkaiin defender C. Muana ball vawrh luh tha zet chu box chhunga awm Lalnunzama chuan pet goal-in an hmahruaina a khung. Bethlehem Vengthlang FC chuan an siphurh sut tumin nawr let mahse goal an thun mai thei lo a, Chanmari FC chuan 1-0 a hmahruaiin chawlh lawk an hmang zui ta a ni.

Second half tan a ni a, Bethlehem Vengthlang FC chuan nawr nghalin C. Tluanga chuan goal ban a petper dawp a, minute 59-ah Jonathan H. Lalhriatkima ball pek tha zet chu PC Vanlalhruaia chuan mawi tak a chhuih lutin an siphurh a rul. Chanmari FC chuan hnehna chan ngei tumin an nawr let a, Muanzova chuan a hun tha a hmang tangkai thei lo. Bethlehem Vengthlang FC pawhin goal an thun belh thei bik lo. Chakzawk awmlo in khelmual an chhuah san dawn emaw tih hnu huntawp dawn minute 2 ala awmin bench a tang a lut midfielder Mark Zothanpuia chuan halfway line bul atangin an chakna goal mawi takin a khung ta a ni.

(adsbygoogle = window.adsbygoogle || []).push({});

Copyright © inkhel.com 2024. All rights reserved.