22 Nov 2019 10:56

inkhel

​Chanmari leh Aizawl FC inhneh tawk Chhinga Veng an lut

Mizoram Premier League (MPL) Season 8 khelh mekah November ni 22, Zirtawpni tlai round 13 match thumna Chanmari FC leh I League Club Aizawl FC inkhelah chak zawk awmlo in 2-2 in an inhneh tawk a, point 1 ve ve an hlawh chhuak. Chanmari FC hian hnehna an chan zawh loh avangin Chhinga Veng FC tan semifinal luhna kawng a inhawng ta a ni. 

Team pahnih te hi round 4-ah intawng tawhin 0-0 in anhneh tawk a, an intawn vawihnihnaah pawh an inhneh tawk leh bawk. Aizawl FC hian an match an khel zo tawh a, point 31 neiin hmahruitu an nih chhunzawm zel a ni. 

Chanmari FC hian point 17 neiin semifinal khelh theihna chance anla nei a, Electric Veng FC hian point 19 annei a, match khat khelh hmabak anla neih ve bawk avangin Electric Veng FC hian hnehna an chan loh a, Chanmari FC hian hnehna an chan chuan Chanmari FC hian semifinal an lut ang.

04:00 PM Chanmari FC 2-2 Aizawl FC

(Lalremruata 59', David Lalrinmuana 66') (F Lalremsanga 1', 86')

MoM: F Lalremsanga, Aizawl FC

First half-ah goal khat a lut a, goal lut hi inkhel tan atanga minute 1-ah Aizawl FC tan forward William Lalnunfela ball pek fing tak chu box chhunga awm F Lalremsanga chuan push lutin an hmahruaina a khung.

Chanmari FC chuan an siphurh sut ngei tumin annawr let a, David Rinmuana corner pet tha zet chu box chhunga awm defender Lalbiaknia chuan goal-ah a chantir thei lo. midfield Lalremruata inhliam vangin forward Lalnunzama luhtir a ni a, an goal nawr na sawt mahse chance erawh annei thei lo a, Aizawl FC chuan 1-0 a hmahruaiin chawlhlawk an hmang zui ta a ni.

Second half-ah goal thum a lut a, Chanmari insiam thain midfielder David Lalrinmuana'n freekick tangin goal ban a petper hnu minute 59-ah David Rinmuana freekick atanga ball kal zel chu forward Lalremruata chuan pet lutin an siphurh a rul.

Chanmari anphur thar hnehna chan ngei tumin annawr chhunzawm a, minute 66-ah David Rinmuana chuan freekick tangin an goal hnihna a khung a, Chanmari chuan 2-1 in hma an hruai. Chanmari chuan goal thun belhna hun tha nei zuiin forward Lalremruata chuan a hun tha a hloh.

Chanmari chuan 2-1 in hnehna an chang mai dawn emaw tih hnu huntawp dawn minute 4 ala awmin Aizawl FC chuan penalty an hlawh chhuak hlauh. He penalty hi F Lalremsanga chuan goal-ah chantirin an siphurh a rul a, chak zawk awmlo in 2-2 in an inhneh tawk zui ta a ni.

(adsbygoogle = window.adsbygoogle || []).push({});