Tunlai Formula One driver tha bera ngaih Lewis Hamilton chuan a world title parukna la zo chiah mahse championship lak belh zel a la tum zia a sawi chhuaka, hmalam pana kal zel a la tum niin a lang.

F1 chanchinah Hamilton hi world title la hnem ber dawttu a ni a, Michael Schumacher chiah pha tawh lovin, Schumacher hian world title pakhatin a la la hnem zawk.

Kum 34 mi Hamilton hi F1 chanchina driver ropui ber pakhat a ni reng tawh dawna, a career a zawh hun meuh chuan F1 chanchina driver ropui bera ngaih a ni lovang tih a sawi theih hauh lo.

Hamilton chuan, “Hmalam pan zel tura mahni kan innawr kal a ngai a, tihtur a la tam tih kan hria a, championship lak tur leh race lak tur a la tam. Formula One en reng rengin ka seiliana, Ayrton Senna-te tih ang kha tih ka chak ve thin.

“F1-a luh kha ka chak em em thin a, title pathum lak te kha a ropui tur zia ka suangtuah thina, tunah erawh chumi let chu ka la tawha, a awihawm loh hial zawk a ni,” a ti.

Ayrton Senna hi Brazilian driver hlui a ni a, kum 1988, 1990 leh 1991 te khan F1 world title te lo la tawhin, kum 1994 khan San Marino Grand Prix-ah accident avangin a boral a ni.