16 Oct 2020 05:39

inkhel

Champions League referee te’n eng tawng nge an hman?

Europe khawmualpuia league hrang hranga club chungnung zualte inelna UEFA Champions League ah hian khawvel ram hrang hrang atangin player an fuan khawm hnem hle a. Mize chi hrang hrang, nunphung inang lo tak tak, tawng chi hran hran hmangtute an ni hlawm.

Hetiang taka mihring inchawhpawlh nasatna tournament liana referee te tan tawng hman chungchangah harsatna a thlen fo a rinawm a. Thenkhatin sap tawng an hriatthiam mai rualin hre ve chiah lo pawh thahnem tak an awm ve thei a ni.

2020 Champions League final bikah pawh khan khawvel ram hrang hrang 11 atangin player an fuan khawm a. Heng player te hi Europe, Asia, North America, South America leh Central America atanga kal khawmte an ni a. Match khat ringawtah pawh heti zat an fuan khawm chuan tournament pumpuiah phei chuan an thahnem tham viau tura ngaih a ni.

Referee te chuan inkhel an thunun a ngai a, player te’n dan an bawhchhiat leh bawhchhiat loh an ven a ngai a, inkhel boruak chhe lutuk tur te, dik lo taka thil tihna te chu an ven a tul thin a. Hetiang ti tur hian player te nen an inbiakpawh theih a pawimawh a, tawng inhriat tawn chu thil pawimawh berte zingah a tel a ni.

Champions League emaw, Europa League emaw enkawl tur chuan UEFA referee te chu English hmang thiam vek tura beisei an ni nghal phawt a. Europe khawmualpuiah English chu tawng tlanglawn ber a nih miau avangin referee te pawhin player te biak nan hian sap tawng hi an hmang nasa ber reng a ni.

Ethnologue in an zir chian dan chuan khawvel pumpuiah pawh English chu tawng hman tlanglawn ber a la ni reng a. Mihring 1.25 billion vel chuan sap tawng hi an hmang thei a, Europe khawmualpuiah pawh kum 15 atanga kum 35 inkar zinga a chanve vel chuan sap tawng hi an hmang thei a ni.

FIFA pawhin tawng pawm bik hi pali an nei mek a, official taka tawng an pawm chu English, Spanish, French leh German te a ni a. Hetiang a nih rual hian referee tur reng rengte chuan English hi an thiam tel ngei ngei a ngai a ni.

‘Football hi khawvel pumpui inbiakpawh theihna tha ber a ni’ tiin an sawi thin a, hei hi a dik thawkhat hle a. Player tam zawk chuan sap tawng an thiam thui lem lo a nih pawhin ‘goal’, ‘foul’, ‘offside’ tih te chu a awmzia an hre chiang a, hrilh fiah hranpa an ngai tawh lem lo.

Referee te pawhin inkhel an enkawl laiin tawng kher lo pawhin an kut hmangin thil tam tak an ti fiah thei a. An kut bakah card leh flag hmangin thu tam tak an sawi thin a, hei hi player te pawhin an hre thiam tlang vek bawk a ni.

World Cup assistant referee thin Sean Hurd chuan, “Ram leh club tana feh chhuak player tam zawk hian English hi tlem tal chu an hre ve deuh vek hlawm a. Thiam vak lo an awm pawhin chet zia atang te, mitmei atang te pawhin thil tam tak a sawi fiah theih vek a ni,” a ti.