15 Mar 2019 07:08

inkhel

Champions League quarter final-a inkhel turte

UEFA Champions League quarter final-a inkhel turte chu an pawt fel tawh a, Barcelona leh Manchester United an inkhel ang a, Manchester City leh Tottenham Hotspur te an inkhel dawn bawk a ni.

Zirtawpniah Nyon, Switzerland a UEFA hmunpuiah quarter final-a inhmachhawn turte hi an pawt a, La Liga champion Barcelona leh Premier League club Manchester United te intum tur chu thawm nei lian deuh ber a ni a. Premier League club pahnih Manchester City leh Tottenham Hotspur te pawh an inhmachhawn dawn a ni.

Italian champion Juventus chuan Dutch club Ajax Amsterdam an hmachhawn dawn a, Cristiano Ronaldo te hi Ajax tan chuan an huphurhawm ve hle dawn a, tlang chho zel tur chuan theihtawp an chhuah tak zet a ngaih hmel hle a. Mahse, Real Madrid meuh hneh theitu an nih avangin Ajax pawh hi chuti taka dah hniam chi chu an ni lo tih a chiang hle.

Nikum lama pahnihna ni thei Liverpool chu Portuguese champion FC Porto nen an inhmachhawn dawn a, Jurgen Klopp chuan Anfield-ah trophy thar hun theih a la tum zel a, 2017-18 final ang kha chu thleng nawn tawh lo turin theihtawp chhuah a tum a rinawm.

Quarter final first leg hi April 9 leh April 10 ah te an khel dawn a, second leg chu kar khat hnua khelh leh tur a ni ang.

Semi final pakhat zawkah chuan English club pahnih Tottenham leh Manchester City inkhela chak zawk zawkin Ajax leh Juventus te inkhela chak zawk zawk an hmachhawn dawn a. Semi final lehlamah Barcelona leh Manchester United te inkhela chak zawk zawkin Liverpool leh FC Porto te inkhela chak zawk zawk an hmachhawn ve dawn bawk a ni.

Semi final first leg hi April 30 leh May 1 ah te an khel ang a, second leg chu kar khat hnuah an khel ve leh dawn a ni.

Quarter finals

AFC Ajax v Juventus

Liverpool v Porto

Tottenham Hotspur v Manchester City

Manchester United v FC Barcelona

Semi finals

Tottenham Hotspur/Manchester City v Juventus/AFC Ajax

Manchester United/Barcelona v Liverpool/Porto