Champions League Player of the Week - Messi

02nd December 2018, 01:12AM

UEFA chuan Barcelona ace Lionel Messi chu Nilainia PSV Eindhoven laka a chet that em avangin Champions League Player of the Week atan an thlang.

Barcelona chuan tun kar laihawl khan PSV Eindhoven chu hnehin knock out stage an inhlangkai ta a. Lionel Messi leh Gerard Pique te chuan Barcelona tan goal an thun a, La Liga club te beiseina chu an tinung zel a ni.

PSV Eindhoven nen an inkhelah hian minute 61-naah goal hmasa ber a lut chauh a, chu chu Argentine superstar Lionel Messi thun hi a ni a. Messi hian he goal a thun hian Barcelona tan Europe khawmualpuia inelna sang berah hian goal 106 a thun tling chiah a. He goal vang hian Messi chuan Cristiano Ronaldo a khum theih phah a, club pakhat tana Champions League goal khung hnem ber a ni.

Cristiano Ronaldo khan Real Madrid ah khan Europe khawmualpui inelna lianah hian goal 105 ngawt mai thunin record a lo siam a, hei hi Nilai zan khan Messi chuan goal khatin a lehpel ta chiah a ni.

Kum 31-a upa Messi chuan a pawlte a chakpui avang hian UEFA chuan Player of the Week atan hian thlan loh chi niin an hre lo a. Tun season chhungin Messi hian Champions League bikah goal 6 chu a thun tling tawh a, tunah hian Barcelona chu La Liga-ah point 25 hmuin pahnihnaah an awm mek a, hmahruaitu Sevilla aiin point 1 chiahin an hniam zawk a ni.

Copyright © inkhel.com 2024. All rights reserved.